Ekibastuz bıligi tótenshe jaǵdaı rejımin ne úshin jarııalady
PAVLODAR. KAZINFORM - Ekibastuz qalasynyń ákimdigi Ekibastuz qalasynda obektilik aýqymdaǵy tehnogendik sıpattaǵy tótenshe jaǵdaı rejıminiń ne úshin jarııalanǵanyn túsindirdi. Negizgi sebep – Ekibastuz JEO-daǵy qazandyq agregattaryn jóndeýge qosymsha qarajat bólý.
Ekibastuz qalasynyń bıligi Energy Solutions Center JShS-degi avarııalyq jaǵdaıǵa baılanysty tehnogendik sıpattaǵy tótenshe jaǵdaı rejımin jarııalaýǵa sheshim qabyldaǵany týraly habarlaǵan edik.
Atalǵan kásiporyn — «Samruq-Energo» AQ-nyń enshiles kompanııasy ári Ekibastuz jylý-energııa ortalyǵyn basqaryp otyr. Ekibastuz qalasynyń ákimdigi tótenshe jaǵdaıdyń sebebin túsindirdi.
«2023 jyly Ekibastuz JEO-da negizgi jáne qosalqy jabdyqtardy jóndeý boıynsha aýqymdy jumystar atqaryldy. Qoldanystaǵy 10 qazandyq agregatynyń 8-i (№ 6, 7, 8, 11, 12, 13, 14, 15) kúrdeli jóndelip, 2 qazandyq agregaty (№5, 9) jóndeýden ótti. Sonyń nátıjesinde 2023-2024 jylǵy jylytý maýsymy shtattyq rejımde ótti. Bıylǵy maýsym aıynda Ekibastuz JEO «Samuryq-Energo» AQ-nyń arnaıy qurylǵan enshiles kompanııasy «Energy Solutions Center» JShS-ǵa senimgerlik basqarýǵa berildi. Ótken maýsymaralyq kezeńde júrgizilgen jóndeý naýqanyn jáne «Samuryq-Energo» AQ-men júrgizilgen taldaýdy eskere otyryp, 2024 jyly «Samuryq-Energo» AQ qarajaty esebinen Ekibastuz JEO-da № 5 qazandyq agregatyna kúrdeli jóndeý jáne № 9 qazandyqqa aǵymdaǵy keńeıtilgen jóndeý júrgizý qajet. Sonymen qatar ótken maýsymda №12 qazandyqtaǵy negizgi jáne qosalqy jabdyqtarǵa 80% kúrdeli jóndeý júrgizildi. Anyqtalǵan tehnologııalyq buzýshylyqtardy eskere otyryp, osy jyly № 12 qazandyq agregatynyń qalǵan 20% jabdyǵyn jańartyp, qosymsha jumystar júrgizý qajet. «Samuryq-Energo» AQ-nan Ekibastuz qalasynyń ákimdigine túsken ótinish boıynsha qoldanystaǵy zańnama sheńberinde jóndeletin obektilerdi aldaǵy jylytý maýsymyna ýaqytyly tapsyrý ári jyl boıy úzdiksiz ystyq sýmen qamtamasyz etý úshin tehnogendik sıpattaǵy Tótenshe jaǵdaı jarııalaý týraly sheshim qabyldandy», - dep málimdedi ákimdikten.
Osylaısha, osy jyly «Energy Solutions Center» («Samuryq-Energo» AQ enshiles kompanııasy) qarajaty esebinen №5 jáne №12 qazan agregattaryn kúrdeli jóndeý, № 9 qazandyq agregatyn keńeıtilgen aǵymdaǵy jóndeý, qalǵan qazandyq agregattary men qosalqy jabdyqtardy, sondaı-aq JEO ǵımarattary men qurylystaryn aǵymdaǵy jóndeý josparlanǵan.
