Ekibastuz áýejaıyn 2028 jyly qaıta ashý josparlanyp otyr
PAVLODAR. KAZINFORM — Ekibastuzdaǵy áýejaıdy qaıta jandandyryp, áýe qatynasyn qalpyna keltirý josparlanyp otyr. Bul týraly Pavlodar oblysynyń ákimi Asaıyn Baıhanov «Ertis: dostyq ózeni — damý ózeni» II halyqaralyq forýmynda aıtty.
Óńir basshysynyń aıtýynsha, Ekibastuzdyń óndiristik áleýeti joǵary bolǵandyqtan, qaladaǵy áýe qatynasyn damytý mańyzdy. Qazir áýejaıdy qaıta iske qosý máselesi pysyqtalyp jatyr.
— Ekibastuz áýejaıyn qaıta jandandyrýdy josparlap otyrmyz. Qazir bul máselemen tyǵyz aınalysyp jatyrmyz. 2028 jyly ony tolyq aıaqtap, ashamyz dep úmittenemin, — dedi Asaıyn Baıhanov.
Atalǵan áýejaı 1986-2008 jyldary jumys istegen. Ákimniń aıtýynsha, nysandy qaıta iske qosý qala men óńirdiń kólik qoljetimdiligin arttyryp, onyń ekonomıkalyq baılanystaryn damytýǵa múmkindik beredi.
Eske sala keteıik, bıylǵy mamyr aıynda Memleket basshysy Qasym-Jomart Toqaev Pavlodar oblysynyń ákimine Ekibastuzdaǵy áýe qatynasyn damytý máselesine nazar aýdaryp, qalada jańa áýejaı ashý máselesin pysyqtaýdy tapsyrǵan bolatyn.
Sondaı-aq bıyl tamyz aıynda Pavlodar áýejaıy ushý-qoný jolaǵy jańǵyrtylǵannan keıin ushaqtardy qabyldaı bastady.
