Ekaterınbýrg - Almaty tasjolynda 3 tonna janarmaı tógildi
KÓKShETAÝ. QazAqparat - Arshaly aýdany aýmaǵynda «Ekaterınbýrg-Almaty» tasjolynyń boıynda benzın tasymaldaıtyn «DAF» kóliginiń tsısternasyna tesilip, 3 tonna benzın tógildi, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, tótenshe jaǵdaı maýsymnyń 1-de Jibek joly aýmaǵy arqyly ótetin «Ekaterınbýrg-Almaty» tasjolynyń 1289-shaqyrymynda bolǵan.
Bul týraly sol kúni saǵat 15:30 kezinde Arshaly aýdandyq polıtsııasynyń kezekshi bólimine habarlandy.
Anyqtalǵandaı, júrgizýshi tıelgen 7 tonna janar-jaǵarmaıdy Nur-Sultan qalasyna apara jatqan.
Jolda tsısterna tesilip, 3 tonna jýyq janarmaı tasjoldyń ústine tógildi.
Bul óz kezeginde ózge kólikterdiń júrýine qaýip tóndirdi.
«Oqıǵa ornyna jetken tártip saqshylary joldyń atalmysh ýchaskesin ýaqytsha japty. Keıin órt sóndirýshiler jetip, janarmaı tógilgen jerdi sýmen shaıyp, qum shashty. Júrgizýshige qatysty Ákimshilik quqyq buzý kodeksiniń 630-babynyń 1-bóligi boıynsha ákimshilik hattama toltyryldy», - dedi vedomstvodan.
