«Ekaterınbor-Almaty» tasjolyndaǵy jol apaty: 2 adam mert bolyp, 4-eýi zardap shekti

KÓKShETAÝ. QazAqparat - Aqmola oblysy aýmaǵynda «Ekaterınbor-Almaty» tasjolynda eki jeńil kólik betpe bet soqtyǵysty, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń málimetinshe, qarashanyń 23-de saǵat 00:10 Jaqsy aýdandyq PB kezekshilik bólimine Perekatnoe stantsııasynyń tusynda, «Ekaterınbor-Almaty» avtojolynyń 967 shaqyrymynda jol-kólik oqıǵasy bolǵany týraly habarlandy.

Anyqtalǵandaı, Qostanaı qalasy baǵytynda júrip bara jatqan «Hyundai Solaris» avtokóliginiń 52 jastaǵy júrgizýshisi rýldi basqara almaı, qarsy baǵytta kele jatqan «Audi V-4» kóligimen betpe bet soqtyǵysty. Saldarynan «Hyundai Solaris» kóliginiń júrgizýshisi men jolaýshysy (Nur-Sultan qalasynyń turǵyndary) oqıǵa ornynda kóz jumdy. Al, Atbasar qalasynyń turǵyny basqarǵan Audi V-4» kóliginiń 59 jastaǵy júrgizýshisi men eki jolaýshysy, sondaı-aq, «Hyundai Solaris» kóliginiń taǵy bir jolaýshysy túrli dene jaraqatymen aýrýhanaǵa tústi.

«Qazirgi kezde osy oqıǵaǵa baılanysty Qylmystyq kodekstiń 345-shi babynyń 4-shi bóligi «kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha sotqa deıingi tergeý bastaldy. Saraptama taǵaıyndaldy», - dedi vedomstvodan.