«Ekaterınbor-Almaty» tasjolynda jaıaý júrginshini kólik qaǵyp ketti
KÓKShETAÝ. QazAqparat - Aqmola oblysynyń Tselınograd aýdanynda jaıaý júrginshini kólik qaǵyp ketti, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, Tselınograd aýdandyq PB kezekshilik bólimine Tóńkeris aýylynyń turǵyny habarlasyp, Altynsarın aýyly mańynda jaıaý júrginshini kólik qaǵyp ketkenin, zardap shegýshiniń jaǵdaıy aýyr ekenin aıtty.
«Anyqtalǵandaı, «Ekaterınbor-Almaty» tas jolynyń 1241-shi shaqyrymynda «Subaru Forester» markaly avtokóliginiń júrgizýshisi baǵdarshamnyń qyzyl túsine qaramastan joldy kesip ótpek bolǵan jaıaý adamdy qaǵyp ketti. Zardap shekken Altynsarın aýylynyń 25 jastaǵy turǵyny», - dedi vedomstvodan.
Qazirgi kezde, osy oqıǵaǵa baılanysty kólik júrgizýshisine qatysty Qylmystyq kodekstiń 345-baby «Kólik quraldaryn basqaratyn adamdardyń jol qozǵalysy nemese kólik quraldaryn paıdalaný erejelerin buzýy» boıynsha is qozǵalyp, sotqa deıingi tergeý amaldary bastaldy.
Aıta ketý kerek, jyl basynan beri oblys aýmaǵynda jaıaý júrginshilerdiń qatysýymen 33 jol-kólik oqıǵasy oryn aldy. Budan 3 adam qaza taýyp, 32 adam jaraqtandy. Onyń ishinde 7 jol-kólik oqıǵasy jaıaý júrginshilerdiń kinásinen bolyp otyr.
