Ekaterına Parafıeva: Biz týǵanda úshem edik...

ALMATY. QazAqparat - Almatyda ál-Farabı kóshesindegi jol apatynda eki aıaǵynan aıyrylǵan Ekaterına Parafıeva áleýmettik jelidegi paraqshasynda dúnıege anadan úshemniń bireýi bolyp týǵanyn, alaıda aman qalǵan jalǵyz ózi ekenin aıtty, dep habarlaıdy QazAqparat tilshisi.

«1986 jylǵy kishkentaı aıaq kıimimdi taýyp aldym. Sizderge men 7 aılyq bolyp dúnıege kelgenimdi, salmaǵym 900 gramm, boıym 37-aq sm bolǵanyn aıtsam sener me edińizder... Biz úshem bolyp týǵanbyz, tek meniń ǵana ómirimdi saqtap qalǵan. Osydan soń, sizder menen jol apatynan keıin muqalmaıtyn tabandylyqty qalaı saqtap qaldyń dep suraısyzdar. Men týmysymnan osy kúresti bastap ketkenmin. Endi ómir ádiletsiz dep, ýaqytym men kúsh-jigerimdi ókpe-renishke toltyrsam, durys pa? Esterińizde bolsyn, ómir bir-aq ret beriledi. Júrek soǵyp turǵanda ol bitpeıdi», - dep jazdy Ekaterına Parafıeva Feısbýktegi paraqshasynda.

Eske sala keteıik, E. Parafıeva 16 maýsymda Almaty qalasyndaǵy  ál-Farabı dańǵylynda bolǵan jol apatynan zardap shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry kóligi ushyp kelip Honda CRV kóligine tıgen. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn. Qazir Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótti.

Osydan bir aı buryn, 24 qazan kúni bastalǵan sot protsesinde avtobýs júrgizýshisi Dəýren Jańabaev jaýapty retinde sotqa tartylǵan. Avtobýs júrgizýshisine QR QK 345-babynyń 2-bólimi boıynsha adam densaýlyǵyna úlken zalal keltirgen jol apatyna əkelgen jol erejesin buzdy degen aıyp taǵyldy. Jańabaevtyń qorǵaýshysy Baqytjan Seıdalıev tergeý barysynda Ekaterına Parafıevanyń is-əreketi durys tergelmegenin, sol úshin qaıta jiberýdi ótingen bolatyn. Aıyptalýshy Jańabaev óz kinəsin moıyndamady.