Ekaterına Aıdova rekord ornatyp, Kalgarı týrnırin jeńip aldy
ALMATY. QazAqparat - Kanadanyń Kalgarı qalasynda konkımen júgirý sportynan ótken halyqaralyq týrnır aıaqtaldy, dep habarlaıdy QazAqparat tilshisi.
Jarysta 27 jastaǵy qazaqstandyq sportshy Ekaterına Aıdova 1 500 metr qashyqtyqty 1.53.53 ýaqytymen eńserip, Qazaqstannyń rekordyn jańartty. Ári týrnırdiń jeńimpazy atandy.
Erler arasyndaǵy jarysta Qazaqstannan barǵan Aleksandr Klenko segizinshi, Demıan Gavrılov - 11, Dmıtrıı Morozov - 14, Vıtalıı Şıgolev - 16, al Ivan Arjanıkov 25-orynmen shekteldi. Jappaı jarysta Gavrılov qurama qorjynyna taǵy bir altyn medal saldy.
Buǵan deıin Dmıtrıı Morozov osy týrnırdiń 5 myń metr jarysynda márege birinshi kelgen. Týrnır qorytyndysy boıynsha, Aıdova «Úzdik sheteldik sportshy» syılyǵyn aldy.
Eske sala keteıik, Klenko men Aıdova buǵan deıin kúmis medalge ıe bolǵan edi. Onyń aldynda, Ekaterına Aıdova AQSh-tyń Solt-Leık-Sıtı qalasynda ótken konkımen júgirýden álem kýboginde de Qazaqstan rekordyn jańartqan bolatyn.
Avtor: Elaman Turysbekov
