Eki jolbarystyń arasy 25 shaqyrym: olar qashan kezdesedi
ASTANA. KAZINFORM — «Іle-Balqash» memlekettik tabıǵı rezervatyna jiberilgen eki jolbarystyń araqashyqtyǵy qazir 20-25 shaqyrymdy quraıdy. Mamandar atalyq jáne urǵashy jolbarystyń aldaǵy ýaqytta bir-birin tabatynyna senimdi. Bul týraly Ekologııa jáne tabıǵı resýrstar mınıstri Álibek Qýantyrov aıtty.
Mınıstrdiń aıtýynsha, Qazaqstanǵa ákelingen jolbarystardyń tabıǵatqa jiberilý reti kezdeısoq tańdalmaǵan. Aldymen urǵashy jolbarys bosatylǵan. Óıtkeni oǵan jańa ortaǵa beıimdelip, óz aýmaǵyn belgileýge jáne kóbeıýge daıyndalýǵa ýaqyt qajet.
— Qazirgi tańda eki jolbarystyń arasynda 20-25 shaqyrym bar. Árıne, olar bir-birin tabady dep oılaımyz. Biz urǵashy jolbarysty birinshi jiberdik. Sebebi ol aldymen óz aýmaǵyn belgilep, jańa ortaǵa beıimdelip, kóbeıýge daıyn bolýy kerek. Ol óz ıisin qaldyrady, keıin atalyq jolbarys ony tabýy tıis. Biz soǵan senemiz, — dedi Álibek Qýantyrov.
Degenmen eki jyrtqyshtyń naqty qashan kezdesetini ázirge belgisiz. Mamandar olardyń jańa ortaǵa beıimdelýin jáne tabıǵattaǵy qozǵalysyn baqylap otyr.
Aıta keteıik, buǵan deıin Qazaqstanǵa ákelingen alǵashqy jolbarys óz betinshe ań aýlap júrgeni habarlandy.
