Eki jylda latıfýndısterden qansha jer qaıtaryldy
ASTANA. KAZINFORM – Latıfýndıster elimizdiń qaı óńirlerinde kóp shoǵyrlanǵan? Bul suraqqa Aýyl sharýashylyǵy mınıstrligi jaýap berdi.
«Oblystyń ýákiletti organdarynyń jer balansy boıynsha joldaǵan málimetine jasalǵan taldaýǵa sáıkes, bir qolda bar aýyl sharýashylyǵy maqsatyndaǵy jerleriniń úlken alańdary - Aqtóbe, Qaraǵandy, Ulytaý oblystarynda», - delingen Aýyl sharýashylyǵy mınıstrliginiń Kazinform agenttigine bergen jaýabynda.
Vedomstvo málimetinshe, iri jer ýchaskeleriniń «bir qolda» shoǵyrlanýyn eskere otyryp, Memleket basshysynyń tapsyrmasyna sáıkes Qazaqstan Respýblıkasynyń zańnamasyn buza otyryp paıdalanylmaǵan jáne berilgen jerlerdi alyp qoıý jónindegi jumys komıssııasy quryldy (Qazaqstan Respýblıkasy Premer-Mınıstriniń 2023 jylǵy 28 sáýirdegi ókimimen). Osy komıssııanyń negizgi mindeti - múddeli memlekettik jáne quqyq qorǵaý organdarynyń ózara is-qımylyn kúsheıtý.
Komıssııa paıdalanylmaıtyn jerlerdi qaıtarý jónindegi jumysty kásipkerlik nysanyna qaramastan júrgizedi.
«Bul rette, osy komıssııa qurylǵan sátten bastap óńirler bólinisinde jerdiń iri menshik ıeleri men jer paıdalanýshylar boıynsha odan ári utymdy jáne tıimdi paıdalaný jónindegi tekserý is-sharalaryn júrgizý úshin, sondaı-aq olardy berý kezinde jer zańnamasy normalarynyń saqtalýy turǵysynda taldaý jasalyp jatyr. Osylaısha, atqarylǵan jumystardyń nátıjesinde 2022 jyldyń basynan bastap 204 iri sýbektide memleketke 4,4 mln ga aýyl sharýashylyǵy jeri nemese el boıynsha alynǵan barlyq jerlerdiń 44% qaıtaryldy. Budan bólek, úlken aýmaqtardyń «bir qolda» kóp shoǵyrlanýyn boldyrmaý maqsatynda 2023 jylǵy 25 qańtarda jer paıdalaný quqyǵynda bolýy múmkin aýyl sharýashylyǵy maqsatyndaǵy jer ýchaskeleriniń shekti mólsherin bekitýdi kózdeıtin Úkimet qaýlysy qabyldandy», - dep atalyp ótken mınıstrlik aqparatynda.
Aıta keteıik, 2023 jyldyń aıaǵynda Aýyl sharýashylyǵy mınıstriniń orynbasary Baǵlan Bekbaýov iri kólemde jer alý protsesteri toqtatylǵanyn aıtty.
2022 jyldyń basynan beri paıdalanylmaıtyn 10 mln gektar aýyl sharýashylyǵy jerleri memlekettik menshikke qaıtaryldy.
Eske salsaq, 2019 jyly Prezıdent Qasym-Jomart Toqaev paıdalanylmaı jatqan jerdi latıfýndısterden qaıtaryp alý tapsyrmasynyń baıaý júzege asyrylýyn synǵa aldy.
