Eki jylda elimizde qant qyzylshasy alqaby keńeıedi
ASTANA. KAZINFORM – Aýyl sharýashylyǵy mınıstrligi qant qyzylshasy alqaby aldaǵy jyldary 40 myń gektarǵa jýyqtaıtynyn málim etti.
«Byltyr qant óndirý kólemi 221,1 myń tonnany qurady, bul 2022 jylǵy uqsas kezeńniń kórsetkishinen 28% tómen (2022 j. – 282,8 myń tonna). Úkimet elimizde Qant salasyn damytýdyń 2022-2026 jyldarǵa arnalǵan keshendi josparyn bekitti. Bul qujat aıasynda qyzylshaǵa arnalǵan egis alqaptaryn 38 myń gektarǵa deıin, otandyq shıkizattan qant óndirý kólemin jyl saıyn 250 myń tonnaǵa deıin jetkizý, ımport úlesin 58 paıyzdan 17 paıyzǵa deıin tómendetý, otandyq shıkizatty qaıta óńdeý esebinen qamtamasyz etýdi 7 paıyzdan 43 paıyzǵa deıin arttyrý eskerilgen», - delingen Aýyl sharýashylyǵy mınıstrliginiń Kazinform agenttigine bergen jaýabynda.
Keshendi jospar boıynsha qant qyzylshasyn ósirýdi yntalandyrý úshin qyzylshany óńdeýge tapsyrý kezinde sýbsıdııalar normatıvi 15 myń teńgeden 25 myń teńgege deıin ulǵaıtyldy. Bul rette, qaıta óńdeýge tapsyrylǵan qyzylshaǵa beriletin sýbsıdııalar kólemi byltyrǵy 3,6 mlrd teńgeden bıylǵy 7,9 mlrd teńgege deıin ósti.
«Sondaı-aq, qant qyzylshasyn ósirýge arnalǵan aýyl sharýashylyǵy tehnıkasyna ınvestıtsııalyq sýbsıdııalardyń úlesi 25 paıyzdan 50 paıyzǵa deıin ósti. Qyzylsha ósirýshiler kóktemgi egis jumystaryna jeńildikti nesıeler, jeńildetilgen dızel otyny, tuqymǵa, tyńaıtqyshtar, ósimdikterdi qorǵaý quraldaryna sýbsıdııalar alady. Jyl sońyna deıin otandyq shıkizattan shamamen 50 myń tonna qant óndirý josparlanǵan», - dep atalyp ótken vedomstvo aqparatynda.
