Eki jylda elektrondy saýdadaǵy shaǵymdar 290% ósken – Májilis jańa zań redaktsııasyn qaraýda
ASTANA. KAZINFORM – Májiliste Saýda jáne ıntegratsııa mınıstri Arman Shaqqalıev Tutynýshylardyń quqyqtaryn qorǵaý týraly zań jobasynyń jańa redaktsııasyn jáne oǵan ilespe zań jobasyn tanystyrdy.
Memleket basshysy 2022 jylǵy 1 qyrkúıektegi Qazaqstan halqyna Joldaýynda «Bizge «Azamat – bıznes – memleket» arasyndaǵy qatynastardy túbegeıli ózgertý qajet. Memleket barlyǵyna teń múmkindikter men ádiletti qamtamasyz etý mindetti» dep aıtqan edi.
Tutynýshylar quqyqtaryn qorǵaý týraly zańǵa sońǵy túzetýler 4 jyldan astam ýaqyt buryn engizilgen. Biraq quqyq qoldaný tájirıbesi onyń qazirgi ýaqyt talabyna saı kelmeıtinin jáne tutynýshylardy qorǵaýdyń tıimdiligine áser etetin quqyqtyq kemshilikterin kórsetti.
«Birinshiden, tutynýshylardyń shaǵymdaryn qaraý men sheshýdiń 4 kezeńdik tártibi tutynýshynyń sotpen qorǵanýǵa konstıtýtsııalyq quqyǵyna kedergi keltiredi, óıtkeni tutynýshylar sotqa júginbes buryn joǵaryda atalǵan kezeńderden ótýge májbúr. Ekinshiden, Tutynýshylar quqyqtaryn qorǵaý zańynyń qoldaný aıasy bólshek saýda jáne turmystyq qyzmettermen ǵana shektelgen. Tutynýshylardyń quqyqtaryn qorǵaý komıteti turǵyn úı-kommýnaldyq, kólik, medıtsınalyq, týrıstik, baılanys qyzmetteri jáne taǵy basqa mańyzdy qyzmet salalarynda tutynýshylar quqyqtarynyń buzylýyna oraı is-sharalar qoldana almaıdy», - dep túsindirdi A. Shaqqalıev.
Úshinshiden, tutynýshylardyń qoǵamdyq birlestikteri áli de jetkilikti dárejede tıimdi jumys istemeıdi, olardyń qyzmeti júıeli túrde birizdenbegen.
Tórtinshiden, tutynýshylardyń ótinishterin bıznestiń qabyldaý jáne qaraý protsesin avtomattandyrý úshin iske qosylǵan «E-tutynushy» aqparattyq júıesi kásipkerlerdiń oǵan erikti túrde tirkelgeninen kútilgen nátıje kórsetpedi.
Besinshiden, QR Ákimshilik quqyq buzýshylyq týraly kodeksinde tutynýshy quqyqtaryn qorǵaý salasyndaǵy ákimshilik quqyqbuzýshylyqtar úshin tek eskertý kózdelgen. Statıstıkaǵa sáıkes, josyqsyz bıznestiń is-áreketterine jyl saıyn tutynýshylardyń shaǵymy artyp jatqandyqtan, Tutynýshylar quqyqtaryn qorǵaý týraly zańdy jetildirý qajettigi týyndap otyr.
«Ótken jyly tutynýshylardyń elektrondyq saýda salasyndaǵy buzýshylyqtarǵa qatysty shaǵymdarynyń 7732-ge deıin kúrt ósip, olardyń sany ótken jylmen salystyrǵanda 15 paıyzdan asqanyn aıtý qajet. Bul elektrondy saýda quraldaryn belsendi paıdalanǵannyń belgisi. Sonymen qatar, 2022 jylmen salystyrǵanda shaǵymdar sany 290% ósken», - deıdi Saýda mınıstri.
Zań jobasyn ázirleý kezinde TMD elderiniń, sondaı-aq Germanııa, Polsha, Túrkııa jáne basqa da elderdiń tájirıbesi zerttelip nátıjesinde birqatar novellalar usynylǵan.
