Eki jasar ógeı ulyn óltirgen Temirtaý turǵynyna sot úkimi shyqty

Qaraǵandyda eki jasar balanyń ólimine qatysty is qaraldy. Sýdıa kisi óltirdi degen kúdikpen ustalǵan er adamǵa úkim shyǵardy. Ol ómir boıyna bas bostandyǵynan aıyryldy, dep habarlaıdy Kazinform. 

Sot protsessi 8 qarashada Qaraǵandy oblysynyń qylmystyq ister jónindegi mamandandyrylǵan aýdanaralyq sotynda ótti. Sot eki jasar ógeı ulyn óltirdi degen aıyppen ustalǵan 24 jastaǵy er adamǵa qatysty isti qarady.

Esterińizge sala keteıik, osy jyldyń 21 naýryzynda Temirtaý qalasyndaǵy kópqabatty úılerdiń birinen eki jasar balanyń denesi tabylǵan bolatyn. Kisi óltirdi degen kúdikpen balanyń anasymen birge turatyn er adam ustaldy.

Aıyptalýshy sot barysynda óz kinásin moıyndady. Sondaı-aq onyń kinási kýágerlerdiń aıǵaqtarymen, zattaı dáleldemelermen, saraptamalardyń qorytyndylarymen jáne qylmystyq istiń basqa da materıaldarymen dáleldendi.

Prokýror aıyptalýshyǵa ómir boıyna bas bostandyǵynan aıyrý jazasyn kesýdi surady. Balanyń anasy aıyptaýshy taraptyń pikirimen kelisti.

Sottalýshynyń advokaty oǵan QK-niń 99-babynyń 3-bóliginiń sanktsııasynda kózdelgen eń tómengi jaza taǵaıyndaýdy surady. Alaıda sýdıa aıyptalýshyny zańnyń bar qatańdyǵymen jazalaý týraly sheshim qabyldady.

«Sot úkimimen K. asa qatygezdikpen jas balany óltirgeni úshin kináli dep tanyldy jáne oǵan tótenshe qaýipsizdiktiń qylmystyq-túzeý júıesi mekemesinde jazasyn óteı otyryp, pedagogıkalyq laýazymdar men kámeletke tolmaǵandarmen jumys isteýge baılanysty laýazymdardy atqarý quqyǵynan ómir boıy aıyra otyryp, ómir boıyna bas bostandyǵynan aıyrý túrindegi jaza taǵaıyndaldy. K.-nyń qylmystyq jaýaptylyǵy men jazasyn aýyrlatatyn mán-jaı onyń mas kúıinde qylmys jasaýy bolyp tanyldy. Kinásin moıyndaýy is boıynsha jeńildetetin mán-jaılar bolyp tanyldy», - dep habarlady Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Úkim zańdy kúshine engen joq.