Eki-úsh jyldan keıin AI fılmdi dástúrli kınodan ajyratý qıyn bolady — Almas Jalı
ASTANA. KAZINFORM — Jasandy ıntellekt osy qarqynmen damı berse, eki-úsh jyldan keıin AI arqyly jasalǵan fılmdi dástúrli tásilmen túsirilgen kınodan ajyratý qıyn bolýy múmkin. Bul týraly Astana AI Film Festival teń quryltaıshysy ári keńes tóraǵasy Almas Jalı aıtty.
Onyń sózinshe, ázirge tolyqmetrajdy fılmdi túgeldeı jasandy ıntellekt arqyly jasaý ońaı emes.
— Qazir bir jarym saǵattyq fılmdi AI kómegimen jasaýǵa áreket jasalyp júr. Nátıjesi jaman emes. Degenmen kórermen onyń jasandy ıntellekt arqyly jasalǵanyn ázirge ańǵara alady, — dedi Almas Jalı.
Ol jańa modelder men platformalardyń óte jyldam damyp kele jatqanyn atap ótti.
— Eger osy qarqyn saqtalsa, eki-úsh jyldan keıin, bálkim, odan da erterek qaı fılmniń AI arqyly, qaısysynyń dástúrli tásilmen túsirilgenin ajyratý qıynǵa soǵýy múmkin, — dedi ol.
Almas Jalıdiń aıtýynsha, jasandy ıntellekt kıno túsirýdiń kóptegen kezeńin jeńildetedi. Dástúrli fılmge úlken komanda, akterler, dekoratsııa jáne ondaǵan túsirilim aýysymy qajet.
— Keıde bir fılmdi daıyndaýǵa bir jylǵa jýyq ýaqyt ketedi. Komandada 100–120 adam jumys isteıdi. Akterlerdiń jumysyn úılestirý, dekoratsııa daıyndaý, túsirilimdi uıymdastyrý kerek. Al jasandy ıntellekt osy jumystyń bir bóligin áldeqaıda jyldam atqarýǵa múmkindik beredi, — dedi ol.
Almas Jalı AI arqyly fılm jasaý ázirge arzan emes ekenin de aıtty.
— Qazir generatsııa arzan emes. Biraq platformalar kóbeıip, báseke kúsheıgen saıyn onyń baǵasy tómendeıdi dep oılaımyn. Dástúrli kıno óndirisimen salystyrǵanda AI arqyly fılm jasaýǵa áldeqaıda az ýaqyt pen eńbek jumsalady, — dedi Almas Jalı.
Buǵan deıin Astana AI Film Festival baıqaýyna 125 elden 8 myńnan astam jumys túskenin jazǵan edik.
