Eki ulymnyń da chempıon bolaryna sendim — Mahmud jáne Tórehan Sabyrhannyń anasy

ASTANA. KAZINFORM – Anglııanyń Lıverpýl qalasynda World Boxing álem chempıonatynda aǵaıyndy Mahmud (55 keli) jáne Tórehan Sabyrhan (70 keli) top jaryp, el qorjynyna eki altyn medal saldy. Qos birdeı chempıonnyń anasy Meńtaı Ásilova «Jibek joly» telearnasyndaǵy «Búgin LIVE» baǵdarlamasyna suhbat berip, aqtyq syndaǵy áseri men tolqyǵan kóńili týraly aıtyp berdi.

Eń aldymen M.Ásilova balalaryn qoldaǵan halyqqa alǵys aıtty.

– Balalaramyzdyń jetistigine qýanamyz. Budan da bıik belesterdi baǵyndyrýyna tilekshimiz. Osy jarysqa ketkende eki balamnyń da chempıon bolyp kelerine sendim. Mahmud birneshe jyl jarystarǵa qatysyp keledi. Al Tórehan alǵash ret eresekter sanatyna aýysyp, birinshi jekpe-jegine qatysty. Onyń qarsylastary da áldeqaıda úlken, anaǵurlym tájirıbeli. Telefonmen sóıleskende «Mahmud saǵan senemiz, myna Tatoshqa da (Tórehan – red.) aǵalyq aqylyńdy aıtyp, rıngke qalaı shyǵýdy aıtyp otyr» dedik, – deıdi Meńtaı Ásilova.

Chempıondardyń anasy uldarynyń jekpe-jegin uzaq qaraı almaıtynyn jetkizdi.

– Keshegi fınalǵa otbasymyzben, týystarymyzben jınaldyq. Biraq tikeleı qaraýǵa júregim daýalamaıdy, ekinshi bólmede úı ishimniń daýsynan-aq bilip otyramyn. Bólek bólmede uldarymnyń tileýin tilep otyramyn. Al qazir qos birdeı ulym chempıon atanǵan soń áserimdi sózben aıtyp jetkize almaımyn, munyń bári júrekte saqtalatyn sátter. Barlyq anaǵa osyndaı qýanyshty sezim tileımin, – deıdi M.Ásilova.

Áleýmettik jelide Tórehandy ıyǵyna salyp kóterip júrgen Mahmudtyń áserli vıdeosy taraǵan edi. Olar otbasynda bes aǵaıyndy, beseýi de bir-birine qamqor ári baýyrmal bolyp ósken.

– Bizdiń bir qyz, tórt ulymyz bar. Bári de bir-birine janashyr, meıirimdi bolyp ósti. Áli kúnge deıin bir-birin qoldap júredi. Otbasymyzda alǵan úlgileri laıym osylaı jalǵasqanyn qalaımyn. Endi uldarymnyń 2028 jyly Olımpıada chempıondary bolýyn tileımin, – dedi mereıli ana.

Aıta keteıik, álem birinshiligine 68 elden 540 boksshy qatysty. Qazaq sportshylary 7 altyn, 1 kúmis jáne 2 qola jeńip alyp, jalpy esepte úzdik atandy jáne tarıhı jeńis syılady.

Memleket basshysy Qasym-Jomart Toqaev bokstan álem chempıonatynda top jarǵan boksshylardy quttyqtady.