Eki týrnırde de jeńis tuǵyryna kóterilgim keledi – Ábıba Ábýjaqynova
ASTANA. KAZINFORM —Ábıba Ábýjaqynovany alda eki aıtýly báseke kútip tur. Aldymen qazaqstandyq dzıýdoshy Aıchı-Nagoıada Azııa oıyndarynyń tatamıine shyǵady. Odan keıin Bakýde ótetin álem chempıonatynda baǵyn synaıdy. Qysqa ýaqyt ishinde eki dodada synǵa túsetin dzıýdoshy INFORMSPORTS tilshisine bergen suhbatynda jarysqa daıyndyǵy týraly aıtyp berdi.
– Ábıba, alda Azııa oıyndary men álem chempıonaty sııaqty eki iri dodada baq synaısyz. Daıyndyq qalaı ótip jatyr?
– Sporttyq mansabymda alǵash ret osyndaı eki iri jarysqa qatar daıyndalyp jatyrmyn. Qatty qobaljý joq. Ár kúndi tıimdi paıdalanyp, sporttyq babymdy saqtaýǵa tyrysamyn.
Eki jarystyń arasy nebári bes kún bolǵandyqtan, kúshti durys bólý óte mańyzdy. Sondyqtan qazir fızıkalyq daıyndyǵymmen qatar, psıhologııalyq turǵydan da ózimdi jaqsy qalypta ustaýǵa mán beremin. Eń bastysy, alǵashqy jarystan keıin ózimdi tez qalypqa keltirip, kelesi beldesýge daıyn bolýym kerek. Buǵan deıin de iri dodalardyń talaıynda synǵa tústim. Sondyqtan alda turǵan jaýapkershilikti jaqsy túsinemin jáne qos týrnırde de sońyna deıin kúresemin.
– Buǵan deıin Azııa oıyndarynyń kúmisin ıelendińiz. Bul joly altyn alýǵa bar kúshińizdi salatyn shyǵarsyz...
– Durys aıtasyz, Azııa oıyndaryndaǵy basty maqsatym – altyn medal alý. Buıyrsa, jeńis tuǵyrynyń eń bıik satysyna kóterilgim keledi. Sol úshin tatamıde óz múmkindigimdi tolyq paıdalanyp, Qazaqstannyń kók týyn bıikte jelbiretýge barymdy salamyn.
Hanchjoýda ótken 2023 jylǵy Azııa oıyndarynda 48 kelige deıingi salmaqta kúmis medal ıelendim. Sol jarystan kóp tájirıbe jınaqtadym. Endi Aıchı-Nagoıada buǵan deıingi nátıjemdi jaqsartýǵa umtylamyn.
– Álem chempıonatynda da byltyr kúmis medal aldyńyz. Bıylǵy basty maqsatyńyz qandaı?
– Álem chempıonaty – men úshin erekshe týrnır. Sebebi munda álemniń eń myqty sportshylarymen beldesip, ózińdi taǵy bir márte synaısyń. Byltyr fınalǵa deıin jetip, kúmis medal aldym. Árıne, bıyl odan da bıik belesti baǵyndyrǵym keledi.
Ár beldesýge tyńǵylyqty daıyndalyp, qarsylastarymdy muqııat zertteımin. Qazir naqty nátıjeni aldyn ala aıtý qıyn, biraq ózime júktelgen mindetti jaqsy bilemin. Ótken jylǵy álem chempıonatynda fınalǵa deıin jettim. Bıyl sol tájirıbem maǵan kómektesedi dep oılaımyn.
– Úlken jarystarda psıhologııalyq qysym joǵary bolady. Mundaı sátte ózińizdi qalaı jigerlendiresiz?
– Qatty qobaljý nemese psıhologııalyq turǵydan álsizdik tanytamyn degen alańdaýshylyq joq. Kerisinshe, osyndaı mańyzdy sátterde ózime degen senimim arta túsedi. Tatamıge shyqqan kezde barlyq oıymdy beldesýge shoǵyrlandyryp, qarsylasyma emes, óz múmkindigime kóbirek mán beremin.
– Álemdik reıtıngide 19-oryndasyz. Bul kórsetkish jerebe barysynda siz úshin qanshalyqty ról oınaıdy?
– Árıne, reıtınginiń belgili bir mańyzy bar, ásirese jerebe kezinde onyń áseri bolýy múmkin. Biraq qazirgi ornymdy úlken másele dep qabyldamaımyn. Sebebi maýsym áli aıaqtalǵan joq, alda ózime qajetti upaılardy jınaýǵa múmkindik beretin jarystar bar. Aldaǵy álem chempıonatynda jaqsy beldesip, reıtıngilik upaıymdy tolyqtyrýym kerek.
Jyl sońynda Masters jarysy da bar. Sondyqtan maýsym sońyna deıin áli talaı múmkindik bolady. Qazirgi 19-oryn meniń kóńil-kúıime nemese daıyndyǵyma keri áser etpeıdi. Kerisinshe, aldaǵy jarystarda óz ornymdy jaqsartýǵa yntalandyrady.
– Ábıbany jeńiske jeteleıtin, kópshilik bile bermeıtin qandaı minezi bar?
– Beldesý kezinde ózimdi ishteı jigerlendirip, bar kúshimdi sońyna deıin sarqýǵa árekettenemin. Qandaı jaǵdaıǵa tap bolsam da, ózimdi joǵaltpaı, sońǵy sekýndqa deıin kúresýge umtylamyn. Tatamıge shyqqanda bar nazarymdy beldesýge aýdaryp, jeńiske degen jigerimdi barynsha oıatamyn. Múmkin, meniń basty qasıetim de – qıyn sátte ózimdi jınap, sońyna deıin berilmeýim shyǵar.
