Eki sportshymyz karateden Azııa chempıony atandy
ASTANA. KAZINFORM – Qytaıdyń Hanchjoý qalasynda ótken WKF karateden eresekter arasyndaǵy XX Azııa chempıonatynda qazaqstandyq sportshylar 2 altyn, 2 kúmis jáne 1 qola medal jeńip aldy.
Sportty damytý dırektsııasynyń baspasóz qyzmeti atap ótkendeı, bıyl atalǵan sary qurlyq dodasyna 30 elden eń tańdaýly 300-den astam sportshy qatysyp, ózara myqtylardy anyqtady. Olardyń arasynda qazaqstandyq sportshylar kýmıte baǵdarlamasy boıynsha el namysyn qorǵady. 19 otandasymyz saıysqa qatysyp, onyń ekeýi altynǵa, ekeýi kúmiske, al taǵy bir sportshymyz qola medalǵa qol jetkizdi.
Fınalda Jolaman Bıǵabyl (-55 kg) Omar Shakrany (Iordanııa), al Nurqanat Ájiqanov (-75 kg) bolsa Kývonchbek Mýhammadıevti (Ózbekstan) utyp, óz salmaǵynda jeńimpaz atandy. Nurqanat jartylaı fınalda álem chempıony Bahman Askarı Gonchehti aıqyn basymdyqpen utqan (7-1).
Aqtyq synǵa shyqqan taǵy bir otandasymyz Ásel Qanaı (-61 kg) kúmis júldege ıe boldy. Sonymen qatar kýmıteden erler komandasy 2-oryn aldy. Tokıo Olımpıadasynyń qola júldegeri Sofıa Berýltseva (+68 kg) qola medal ıegeri atandy. Jarys nátıjesi boıynsha erler komandasy álem kýbogyna joldama aldy.
Qazaqstan jalpy esepte Japonııa men Vetnamnan keıingi 3-orynǵa turaqtady.
Japonııa 5 altyn, 3 kúmis, 3 qola medal jeńip alsa, Vetnam sportshylary 3 altyn, 2 kúmis, 1 qola medal enshiledi.
