«Eki saǵat saıyn basymnan urdy»: Atyraýda qarııa ulynan kórgen zábirin sotta aıtyp berdi

ATYRAÝ. KAZINFORM — Atyraýda týǵan ulynan taıaq jep, densaýlyǵy syr bergen toqsanǵa taıaǵan qarııa sotqa kelip, basynan ótken oqıǵany baıandady. Qyzylqoǵa aýdany Saǵyz aýylynyń turǵyny Ádilhan Sısenov kenje ulynyń ózin birneshe saǵat boıy úıge qamap, qol-aıaǵyn skotchpen baılaǵanyn jáne basynan qaıta-qaıta urǵanyn aıtty. Qazir ol balasynyń zań aldynda jaýap bergenin talap etip otyr.

«Eki saǵat saıyn basymnan urdy»: Atyraýda qarııa ulynan kórgen zábirin sotta aıtyp berdi
Vıdeodan alynǵan kadr

Qylmystyq is Jylyoı aýdandyq sotynda qaralyp jatyr. Qarııa sotta ulynyń áreketin egjeı-tegjeıli aıtyp berdi.

— Tas tóbemnen ura berdi. Aldymen qolymen, keıin qalyń skotchpen urdy. Maǵan kún kórsetpeıtin boldy. Eki saǵat saıyn kelip urady. Basqa jerimnen emes, únemi tas tóbemnen soqqy jasaıdy. Oıy — qylmys jasap alyp, meni kemtar qylý bolǵan sııaqty. Saǵat segizden túngi tórtke deıin qamaýda boldym. Qol-aıaǵymdy skotchpen baılady, — dedi Ádilhan Sısenov.

«Eki saǵat saıyn basymnan urdy»: Atyraýda qarııa ulynan kórgen zábirin sotta aıtyp berdi
Vıdeodan alynǵan kadr

Oqıǵa bıyl maýsym aıynda bolǵan. Qart adam múmkindik týǵan sátte úıden qashyp ketken. Keıin ol jaqyn týysynyń úıine baryp, bolǵan jaıtty baıandaǵan. Osydan keıin jaǵdaı qoǵam nazaryn aýdaryp, kenje ulyna qatysty qylmystyq is qozǵaldy.

Qarııanyń aıtýynsha, ulynyń soqqysynan keıin densaýlyǵy kúrt nasharlaǵan. Ol basynan alǵan jaraqattardyń saldarynan ınsýlt bolǵanyn aıtady. Sondaı-aq kıim-keshegin de ózine bermeı qoıǵanyn jetkizdi.

Sot protsesi bastalǵan tusta jábirlenýshiniń densaýlyǵy syr berdi. Qyrkúıek aıynda dárigerler oǵan mıkroınsýlt dıagnozyn qoıǵan. Týystary onyń jaǵdaıyna alańdap, kútimine erekshe kóńil bólgen. Nátıjesinde aqsaqaldyń densaýlyǵy birtindep jaqsarǵan.

Aıyptalýshy — jábirlenýshiniń 47 jastaǵy kenje uly. Oǵan qatysty Qazaqstan Respýblıkasy Qylmystyq kodeksiniń 109-1-baby 2-bóliginiń 3-tarmaǵy (Dármensiz kúıdegi nemese ózine materıaldyq ne basqa jaǵynan táýeldi adamdy uryp-soǵý)boıynsha qylmystyq is qaralyp jatyr.