Eki prezıdenttiń kezdesýi Qazaqstan men Ózbekstan halyqtaryn jaqyndastyrý jolyndaǵy mańyzdy qadam boldy
ASTANA. KAZINFORM — Prezıdentter Qasym-Jomart Toqaev pen Shavkat Mırzıeevtiń Almatyda ótken beıresmı kezdesýi baýyrlas Qazaqstan men Ózbekstan halyqtaryn jaqyndastyrý jolyndaǵy mańyzdy qadam boldy. Bul týraly Prezıdent keńesshisi – Baspasóz hatshysy Rýslan Jeldibaı jazdy.
— Bul memleketter basshylarynyń dál osyndaı formattaǵy alǵashqy kezdesýi emes. Prezıdentter 2023 jyly Shymkentte, al 2024 jyly Hıýada beıresmı júzdesken bolatyn. Mundaı kezdesýlerdiń turaqty túrde ótýi — prezıdentterdiń joǵary deńgeıdegi ózara túsinistigi men senimi qalyptasqanyn kórsetedi, — dep jazdy ol.
Almatydaǵy kelissóz mazmundy ári nátıjeli ótti. Memleketter basshylary saýda-ekonomıkalyq, ınvestıtsııalyq, kólik-logıstıkalyq yntymaqtastyqtyń negizgi máselelerin talqylady. Aımaqtyq kún tártibi de nazardan tys qalǵan joq.
— Qandaıda bir kelisimderge qol qoıý josparda bolmasa da, prezıdentter jaýapty vıtse-premerler men mınıstrlerge birqatar tapsyrma berdi. Atap aıtqanda, taýar aınalymyn ulǵaıtý, kólik qatynastaryn arttyrý jáne óńirler arasyndaǵy baılanysty nyǵaıtý máseleleri talqylandy. Biraz tapsyrmanyń naqty merzimderi belgilendi. Úkimet músheleri memleketter basshylarynyń kelesi kezdesýinde júktelgen mindetterdiń nátıjesi jóninde esep berýge tıis, — dedi Rýslan Jeldibaı.
Prezıdentterdiń Almatydaǵy jumys saparynyń baǵdarlamasy is-sharaǵa toly boldy.
— Shavkat Mırzıeev Qazaqstannyń aqparattyq tehnologııalar men jasandy ıntellekt salasyndaǵy jetistikterine qyzyǵýshylyq tanytty. Ózbek eliniń basshysy AlmatyFair.ai kórmesindegi ár stendke aıaldap, túrli IT-sheshimderdiń erekshelikteri týraly egjeı-tegjeıli surady. Ózderińizge málim, elimiz GovTech jáne FinTech damýy boıynsha álemdik kóshbasshylardyń sanatyna enedi. Astana óz tájirıbesin Tashkentpen bólisýge daıyn, — dedi ol.
Memleketter basshylary belgili sýretshiler Ábilhan Qasteev pen Oral Tańsyqbaevtyń kórmesin tamashalady. Bul sımvoldyq mánge ıe oqıǵa boldy.
Jalpy Oral Tańsyqbaevtyń ómir jolynda birshama qyzyq derekter bar. Ol — Tashkentte dúnıege kelgen, etnıkalyq qazaq. Ózbekstannyń beıneleý óneriniń negizin qalaǵan. Onyń Ózbekstan mýzeılerindegi týyndylary Qazaqstan jurtshylyǵyna keń kólemde alǵash ret usynylyp otyr. Osydan biraz buryn atalǵan kórmeni Ózbekstan Prezıdentiniń kómekshisi Saıda Mırzıeeva ashqan bolatyn. Budan biz halyqtarymyzdyń mádenıeti ortaq ekenin kóremiz. Mundaı is-sharalar sózsiz jalǵasýy kerek.
Shavkat Mırzıeevtiń Almatyǵa jumys sapary mazmundy ári tabysty boldy. Ózara birlesken josparlar, eń bastysy, eki el prezıdentteriniń erik-jigeri men qoldaýy bar.
— Astana men Tashkenttiń tyǵyz baılanysy tutas Ortalyq Azııadaǵy memleketaralyq qatynasty nyǵaıtý men turaqtylyqty saqtaýdyń qozǵaýshy kúshine aınalyp úlgerdi. Memleket basshysy Qasym-Jomart Toqaevtyń óńirdegi jaǵdaı elderimiz arasyndaǵy qarym-qatynastyń órbýine baılanysty dep aıtqany tegin emes. Prezıdentterdiń dástúrge aınalǵan osyndaı beıresmı kezdesýleri aldaǵy ýaqytta da shyn mánindegi baýyrlastyq, dostyq jáne odaqtastyq sıpattaǵy qazaq-ózbek qatynastarynyń mán-mazmunyn baıyta túserine senimdimin, — dep jazdy Rýslan Jeldibaı.
Aıta ketelik Shavkat Mırzıeev beıresmı kezdesý ótkizý úshin Qazaqstanǵa jumys saparymen kelgen edi.