Eki páter, Toyota Camry, 1,2 mln teńge jalaqy: Eńbek mınıstri qaı sanatqa jatatynyn ashyq kórsetti
ASTANA. KAZINFORM — Eńbek jáne halyqty áleýmettik qorǵaý mınıstri Asqarbek Ertaev otbasynyń ál-aýqatyn baǵalaıtyn onlaın-kalkýlıator arqyly óz otbasyn tekserip kórdi. Nátıjesinde onyń otbasy V sanatyna jatqyzyldy.
Eńbek mınıstri búgin «Ál-aýqatty baǵalaý kalkýlıatoryn» tanystyrdy. Jaqyn arada bul qural kópshilikke qoljetimdi bolady. Onyń kómegimen árbir azamat Baǵalaý ádistemesine sáıkes óziniń ál-aýqat deńgeıin baǵalaı alady.
Mınıstr jańa ádistemeniń qalaı jumys isteıtinin kórsetý úshin óz otbasynyń tabysy men múlki týraly málimetterdi jarııa etti.
Asqarbek Ertaev 49 jasta, aı saıynǵy jalaqysy — 1,2 mln teńge. Jubaıy jumys istemeıdi, onyń jasy 44-te. Otbasynda tórt bala bar.
Mınıstrdiń úlken uly 29 jasta jáne aıyna 600 myń teńge tabady. Ortanshy uly 23 jasta, onyń aılyq tabysy — 400 myń teńge. Sondaı-aq mınıstrdiń 13 jastaǵy qyzy men tórt jastaǵy kenje uly bar.
Otbasynyń Astanada 100 jáne 60 sharshy metrlik eki páteri bar. Budan bólek, 2013 jylǵy Toyota Camry 50 avtokóligi tirkelgen. Mınıstrdiń málimetinshe, otbasynyń bıznesi de, jer ýchaskeleri de joq.
Osy derekterdi onlaın-kalkýlıatorǵa engizgende, mınıstrdiń otbasy V sanatyna jatqyzyldy.
Aıta keteıik, V sanaty — ekonomıkalyq turǵydan turaqty, jetkilikti deńgeıdegi otbasylar. Bul kategorııaǵa 14 túrli járdemaqy berý toqtatylady.
Eske sala ketsek, endi er adam dekretke shyqsa da, járdemaqy áıelge beriledi.
Balasy 1,5 jasqa tolmaı jumysqa shyqqan analardyń járdemaqysy saqtalady.
