Eki óńirde júk jáne basqa da kólik túrleriniń qozǵalysyna shekteý qoıylady
ASTANA. KAZINFORM — 2026 jylǵy 22 qazanda aýa raıynyń buzylýyna baılanysty Shyǵys Qazaqstan jáne Qaraǵandy oblystaryndaǵy respýblıkalyq mańyzy bar avtojoldardyń keıbir bólikterinde kólik qozǵalysyna shekteý qoıylady. Bul týraly «QazAvtoJol» habarlady.
Shyǵys Qazaqstan oblysynda saǵat 20:00–den bastap «Óskemen — Rıdder — RF shekarasy» avtojolynyń 15–105-shaqyrym aralyǵynda (Beloýsovka kenti — Rıdder qalasy) tirkemesi jáne jartylaı tirkemesi bar júk kólikteriniń qozǵalysyna shekteý engiziledi.
Al Qaraǵandy oblysynda saǵat 21:00–den bastap KAZ 15 «Qaraǵandy — Aıagóz — Tarbaǵataı — Boǵas» avtojolynyń 60–265-shaqyrym aralyǵynda (Botaqara kenti — Baqty kenti) jazǵy dóńgelekpen jabdyqtalǵan barlyq kólik túrleriniń qozǵalysyna tyıym salynady.
Eki jol ýchaskesindegi qozǵalysty da 2026 jylǵy 23 qazanda saǵat 08:00-de qaıta ashý josparlanǵan.
Jol jaǵdaıy týraly qosymsha aqparatty táýlik boıy jumys isteıtin 1403 baılanys ortalyǵynan alýǵa bolady.
Eske salaıyq, buǵan deıin túngi jáne tańǵy ýaqytta Aqmola, Abaı, Almaty, Pavlodar, Qaraǵandy, Jetisý, Soltústik Qazaqstan jáne Shyǵys Qazaqstan oblystarynda qar aralas jańbyr men qar jaýyp, keı jerlerde kóktaıǵaq bolatynyn habarlaǵanbyz.
