Eki óńirde memlekettik energetıkalyq qadaǵalaý departamentiniń basshylary aýysty

ASTANA. KAZINFORM — Energetıka mınıstrliginiń Memlekettik energetıkalyq qadaǵalaý jáne baqylaý komıtetinde óńirlik deńgeıde jańa kadrlyq taǵaıyndaýlar ótti, dep habarlaıdy vedomstvonyń baspasóz qyzmeti.

Mańǵystaý oblysy boıynsha Komıtettiń aýmaqtyq departamentiniń basshysy laýazymyna Ashat Hamıtuly Jaqypov taǵaıyndaldy.

Ol Pavlodar memlekettik ýnıversıtetin «Injener» mamandyǵy boıynsha bitirgen. Eńbek jolyn 2008 jyly «Pavlodarenergo» AQ-da bastap, slesar, mashınıst jáne týrbına tsehynyń aǵa mashınısi qyzmetterin atqarǵan.

2013 jyldan beri memlekettik energoqadaǵalaý júıesinde jumys isteıdi. Osy ýaqyt ishinde Shyǵys Qazaqstan jáne Qaraǵandy oblystaryndaǵy departamentterde bas sarapshy, basshynyń orynbasary jáne basshy qyzmetterin atqardy. Komıtettiń ortalyq apparatynda elektr jáne jylý kózderin baqylaý basqarmasyn basqardy.

2023–2025 jyldary Komıtettiń elektr-jylý óndirýshi stantsııalaryna baqylaý jasaý basqarmasynyń basshysy boldy.

Abaı oblysy boıynsha Komıtettiń aýmaqtyq departamentiniń basshysy laýazymyna Demın Nıkolaı Aleksandrovıch taǵaıyndaldy.

Ol Shákárim atyndaǵy ýnıversıtettiń túlegi ári jylýenergetıka mamandyǵy boıynsha magıstr.

Eńbek jolyn 2007 jyly «Teplokommýnenergo» ShMK-da qazandyq mashınısti bolyp bastaǵan. Keıin aǵa mashınıst, stansa bastyǵy, № 1 JEO bastyǵy, sondaı-aq óndiris jónindegi dırektordyń orynbasary qyzmetterin atqarǵan.

2018–2024 jyldary kásiporyn dırektorynyń mindetin atqarýshy boldy, odan keıin Abaı oblysy boıynsha aýmaqtyq departament basshysynyń orynbasary qyzmetin atqardy.

Budan buryn Qaraǵandy oblysynda Investorlardy qoldaý ortalyǵynyń basshysy taǵaıyndalǵanyn jazǵanbyz.