Eki óńirde 45 myń dozaǵa teń esirtki tárkilendi - polıtsııa
ASTANA. KAZINFORM – Іshki ister mınıstrligi «Zań men tártip» qaǵıdaty aıasynda júrgizilgen jedel is-sharalar nátıjesinde eki óńirde esirtkiniń iri partııalary tárkilengenin málimdedi.
Vedomstvonyń dereginshe, sáýir aıynyń ekinshi onkúndiginde zańsyz aınalymnan jalpy sany 45 myńnan astam bir rettik dozaǵa teń esirtki alynǵan.
– Abaı oblysynda jedel aqparatty tekserý barysynda 21 jastaǵy júrgizýshi ustaldy. Onyń kóligin tekserý kezinde taratýǵa daıyn 2 keliden astam gashısh maıy anyqtalyp, tárkilendi. Ustalǵan azamat esirtkini ınternet-dúken kýratorynyń nusqaýy boıynsha taratqanyn moıyndady. Sonymen qatar elordada ınternet-platformalar arqyly jumys istegen 26 jastaǵy áıel ustaldy. Jeke tintý jáne jalǵa alynǵan páterdi tekserý kezinde salmaǵy 1 keliden asatyn eki paket sıntetıkalyq “A-PVP” esirtkisi, elektrondy tarazylar men 100-den astam oraý paketteri tárkilendi, – dep habarlaıdy Polisia.kz.
Qazirgi ýaqytta sotqa deıingi tergep-tekserý júrgizilýde. Esirtki jetkizý arnalary, taralý marshrýttary jáne zańsyz qyzmetke baılanysty qarjy aǵyndarynyń kózderi anyqtalýda. Kúdiktiler ýaqytsha ustaý ızolıatoryna qamalǵan.
ІІM málimetinshe, árbir toqtatylǵan esirtki taratý arnasy qoǵam úshin qaýipti azaıtýǵa baǵyttalǵan naqty nátıje bolyp tabylady. Vedomstvo esirtki jelilerine qarsy kúresti júıeli túrde jalǵastyratynyn atap ótti.
Aıta keteıik, Óskemende iri esirtki qoımasy anyqtalyp, 100 kelige jýyq marıhýana tárkilendi.
