Eki óńirde 2,4 myń shaqyrym joldyń qaýipsizdigi halyqaralyq standartpen tekseriledi
ASTANA. KAZINFORM — Batys Qazaqstan jáne Mańǵystaý oblystarynda jol ınfraqurylymyn baǵalaýdyń zamanaýı halyqaralyq tásilderin qoldana otyryp, avtomobıl joldarynyń qaýipsizdigine aýdıt pen ınspektsııa júrgizý jónindegi aýqymdy joba bastaldy. «Qazaqstan jol ǵylymı-zertteý ınstıtýty» AQ (QazjolǴZI) oblystyq mańyzy bar 2,4 myń shaqyrymnan astam avtomobıl jolyn keshendi tekserýge kiristi.
Kólik mınıstrliginiń habarlaýynsha, joba aıasynda jalpy uzyndyǵy 2 414 shaqyrym avtomobıl joly qamtylady. Onyń ishinde 1 384 shaqyrymy Batys Qazaqstan oblysynda, al 1 030 shaqyrymy Mańǵystaý oblysynda ornalasqan.
Jobanyń negizgi maqsaty — ınjenerlik erekshelikterine baılanysty jol qozǵalysy qaýipsizdigin arttyrý boıynsha qosymsha sharalardy qajet etýi múmkin jol ýchaskelerin anyqtaý.
— Dástúrli tekserýlerden aıyrmashylyǵy, jol qaýipsizdigi aýdıti jol ınfraqurylymyn jan-jaqty baǵalaýdy kózdeıdi. Mamandar joldyń geometrııalyq parametrlerin, kóriný qashyqtyǵyn, jol jabynynyń jaı-kúıin, jol tańbalaryn, jol belgilerin, qorshaý bógetterin, jol jıekterin, jaıaý júrginshiler ótkelderin, qoǵamdyq kólik aıaldamalaryn, qıylystar men janasýlardy taldap, qosymsha ınjenerlik sheshimderdi qajet etýi múmkin ýchaskelerdi aıqyndaıdy, — delingen habarlamada.
Jumystardy júrgizý barysynda QazjolǴZI jol ınfraqurylymynyń qaýipsizdigin basqarý salasyndaǵy halyqaralyq tájirıbeni qoldanady. Ádistemeniń negizine Chehııa Respýblıkasynyń kólik qaýipsizdigi salasyndaǵy jetekshi ǵylymı-zertteý ortalyqtarynyń biri — Brno qalasyndaǵy CDV (Centrum dopravního výzkumu) Kólik zertteýleri ortalyǵynyń tájirıbesi alyndy.
— QazjolǴZI atalǵan Chehııanyń ǵylymı ortalyǵymen qoldanystaǵy memorandým aıasynda yntymaqtastyq ornatyp, tájirıbe almasý, mamandardy daıarlaý jáne birlesken jobalardy iske asyrý baǵytynda jumys júrgizip keledi. CDV sarapshylary Eýropalyq Odaqtyń 2008/96/EC «Jol ınfraqurylymy qaýipsizdigin basqarý týraly» dırektıvasyn Chehııada engizýge jáne avtomobıl joldary qaýipsizdigi aýdıtorlaryn daıarlaýǵa tikeleı qatysqan. Zertteý jumystary zamanaýı mobıldi jol zerthanasynyń kómegimen júrgizilip jatyr. Arnaıy dıagnostıkalyq keshen avtomatty rejımde jol jabynynyń boılyq tegistigin, iz tereńdigin ólsheıdi, jol betiniń tsıfrlyq modelin qalyptastyrady, jaryqtar, shuńqyrlar, shógýler jáne basqa da aqaýlardy tirkeıdi, sondaı-aq jol ınfraqurylymynyń úzdiksiz foto jáne beınetúsirilimin júzege asyrady, — dep habarlady vedomstvo.
Tekserý qorytyndysy boıynsha qosymsha sharalardy qajet etetin árbir jol ýchaskesi úshin jol qozǵalysy qaýipsizdigin arttyrýǵa baǵyttalǵan ınjenerlik usynymdar ázirlenedi. Anyqtalǵan barlyq erekshelik geografııalyq koordınattarǵa baılanystyrylyp, jumystardyń nátıjesinde biryńǵaı tsıfrlyq derekter bazasy men jol qozǵalysy qaýipsizdigin arttyrý sharalaryn josparlaý kezinde birinshi kezekte nazar aýdarýdy qajet etetin ýchaskelerdiń kartasy qalyptastyrylady.
Mamandardyń aıtýynsha, halyqaralyq tájirıbeni qoldaný jol ınfraqurylymyndaǵy jekelegen kemshilikterdi joıýdan jol qozǵalysy qaýipsizdigine áser etetin faktorlardy júıeli baǵalaýǵa kóshýge múmkindik beredi. Mundaı tásil álemdik tájirıbede keńinen qoldanylady jáne avtomobıl joldaryn damytý men paıdalaný kezinde tıimdi ınjenerlik sheshimder qabyldaýǵa negiz bolady.
Eske salaıyq, buǵan deıin Qazaqstanda jarty jylda jol apatynan 807 adam qaza tapqanyn habarlaǵan edik.
