Eki oblysta sý zańnamasyn buzǵandarǵa 46,7 mln teńge aıyppul salyndy
ASTANA. KAZINFORM – Aral-Syrdarııa basseıni sý ınspektsııasy 2025 jyldyń alǵashqy 9 aıynda júrgizgen tekseristerdiń nátıjesinde 439 ákimshilik is qozǵaldy. Sý resýrstary jáne ırrıgatsııa mınıstri Nurjan Nurjigitov ınspektsııanyń jyl basynan bergi jumysy týraly esebin tyńdady.
Sý resýrstary jáne ırrıgatsııa mınıstrliginiń málimetine súıensek, osy kezeń aralyǵynda sý zańnamasyn buzǵandarǵa salynǵan aıyppuldyń jalpy somasy – 46,7 mln teńge.
Sonymen qatar jyl basynan beri Aral-Syrdarııa basseındik sý ınspektsııasy Qyzylorda jáne Túrkistan oblystarynda arnaıy sý paıdalanýǵa 286 ruqsat berdi.
– Ótken vegetatsııa kezeńinde Aral-Syrdarııa sý sharýashylyǵy basseıninde zańsyz sý alý jáne tirkelmegen sorǵy qondyrǵylaryn ornatý faktileri anyqtaldy. Sýarmaly sýdy ádil bólý maqsatynda ınspektorlar mınıstrliktiń ortalyq apparaty jáne «Qazsýshar» RMK mamandarymen birlesip sý sharýashylyǵy jaǵdaıyna turaqty monıtorıng júrgizdi. Jańa Sý kodeksinde kózdelgen baqylaý fýnktsııalary basseındik sý ınspektsııalaryna buzýshylyqtarǵa jedel áreket etýge múmkindik beredi, - dedi Aral-Syrdarııa basseıni sý ınspektsııasynyń basshysy Zeınolla Qaztoǵanov.
Eske salsaq, osyǵan deıin Astanada 6 eldiń sý mamandary bas qosqanyn jazǵanbyz.