Eki oblysta mektepterdiń qaýipsizdik júıesinde kemshilikter anyqtaldy - ІІM
ASTANA. KAZINFORM – Búgin Úkimet otyrysynda Іshki ister mınıstri Erjan Sadenov jańa oqý jylyna daıyndyq sharalaryna qatysty túsinik berdi.
- Bilim berý obektileri qaýipsizdik talaptary boıynsha tolyqtaı tekserildi. Jalpy, mekemeler tarapynan tıisti jumys júrgizilip jatyr. Búginde uıymdardyń 100 paıyzy beınebaqylaý júıelerimen jáne dabyl túımelerimen jabdyqtalǵan. Mektepterdiń 93 paıyzynyń beınekameralary jedel basqarý ortalyǵyna qosylǵan. Bul rette Qostanaı jáne Soltústik Qazaqstan oblystarynda jumystar jetkiliksiz. Bul óńirlerde mektepterdiń tek 70-ten astam paıyzy polıtsııaǵa qosylǵan. Tekserý barysynda 500-ge jýyq kemshilik anyqtaldy. 174 basshy jaýapqa tartyldy. Oqý-aǵartý mınıstrligine jáne ákimdikterge atalǵan kemshilikterdi qysqa merzimde joıý qajet, - dedi E. Sadenov.
Sonymen qatar ol bilim berý nysandarynyń mańynda jol ınfraqurylymy tekserilgenin aıtty. Mekemelerdiń 90 paıyzy talaptarǵa sáıkes keledi.
- Biraq birneshe óńirde bul jumysty qolǵa alý qajet, ıaǵnı Aqmola, Aqtóbe, Jambyl oblystary. Jalpy el boıynsha 180-nen astam baǵdarsham, 1 myńǵa jýyq jasandy jol kedergisi, 4 myńnan astam jol belgisi, 13 myń metr jaıaý júrginshiler qorshaýy jáne 1 150 syrtqy jaryqtandyrý qurylǵysy ornatylýy qajet. Ákimdikterge bul jumysty tezirek aıaqtaý kerek, - dedi mınıstr.
Buǵan deıin habarlanǵandaı, bıyl 1-synypqa 380 myńnan astam bala qabyldanady.
