Eki oblysta kólik qozǵalysyna shekteý qoıyldy
ASTANA. KAZINFORM – QazAvtoJol aýa raıyna baılanysty Pavlodar jáne Qaraǵandy oblystarynda jol jabylǵanyn habarlady.
«2026 jylǵy 6 aqpan saǵat 03:30-de aýa raıynyń buzylýyna baılanysty respýblıkalyq mańyzy bar «Qyzylorda - Jezqazǵan - Qaraǵandy - Shiderti» avtomobıl jolynyń 1135-1206 shaqyrym aralyǵyndaǵy ýchaskesi (Qaraǵandy oblysynyń shekarasynan Shiderti eldi mekenine deıin) barlyq kólik túrleriniń qozǵalysyna shekteý engiziledi», delingen habarlamada.
Joldy 2026 jyly 6 aqpan saǵat 08:00-de ashý josparlanǵan.
Sondaı-aq Qaraǵandy oblysynda da kólik qozǵalysyna shekteý qoıyldy.
2026 jylǵy 6 aqpan saǵat 04:00-de aýa raıynyń buzylýyna baılanysty tómendegi respýblıkalyq mańyzy bar avtojoldarda barlyq kólik túrleriniń qozǵalysyna shekteý engiziledi:
- «Astana-Qaraǵandy-Almaty» avtojolynyń 248-592 shaqyrym aralyǵyndaǵy ýchaskesinde (Atameken aýyly - Balhash qalasy);
- «Qaraǵandy – Aıagóz – Tarbaǵataı – Buǵaz» avtojolynyń 17-217 shaqyrym aralyǵynda (Qaraǵandy qalasy – Qarqaraly aýyly);
- «Qyzylorda-Jezqazǵan-Qaraǵandy-Shiderti» avtojolynyń 970-1135 shaqyrym aralyǵy (Qaraǵandy qalasynan Pavlodar oblysynyń shekarasyna deıin).
- Astana-Qaraǵandy(aınalma jolmen) - Almaty" avtojolynyń 164-198 shaqyrym aralyǵy, (Temirtaý aqy alý pýnkti -Qaraǵandy q.).
Joldy 2026 jyly 6 aqpan saǵat 09:00-de ashý josparlanǵan.
Aıta keteıik, búgin elimizdiń úsh oblysynda kólik qozǵalysyna shekteý qoıyldy.