Eki myńnan astam qandas memlekettik bilim grantyn ıelendi
ASTANA. KAZINFORM — 2026-2027 oqý jylynda jalpy bólingen granttyń 4%-y qandastarǵa baǵyttaldy. Bıyl atalǵan kvota aıasynda barlyǵy 2 497 grant bólinip, onyń 95,2% ıgerildi. Osylaısha 2 378 qandas talapker Qazaqstannyń joǵary oqý oryndaryna tústi. Bul týraly Otandastar qory habarlady.
— 2026 jyly 4% kvota boıynsha bólingen 2 497 granttyń 2 378-i ıgerildi. Bul kórsetkish kvota tarıhyndaǵy eń joǵary nátıjelerdiń biri bolyp otyr. Bólingen oryndardyń basym bóligi tehnıkalyq, jaratylystaný-matematıkalyq jáne pedagogıkalyq baǵyttarǵa tıesili, — deıdi Otandastar qory.
Grant ıelengen qandastardyń eń kóbi ınjenerlik, óńdeý jáne qurylys salalaryna túsken — 667 adam. Sonymen birge, aqparattyq-kommýnıkatsııalyq tehnologııalar baǵytynda — 415, jaratylystaný ǵylymdary, matematıka jáne statıstıka mamandyqtarynda — 367, pedagogıkalyq ǵylymdar boıynsha — 489 talapker bilim alatyn boldy. Densaýlyq saqtaý salasyn 108, qyzmet kórsetý baǵytyn — 87, áleýmettik ǵylymdar, jýrnalıstıka jáne aqparat mamandyqtaryn — 60 talapker tańdaǵan.
Sońǵy bes jyldaǵy kórsetkishter qandastarǵa arnalǵan granttardyń ıgerilý deńgeıi aıtarlyqtaı artqanyn kórsetedi. Máselen, 2022 jyly 2 220 granttyń 654-i ǵana ıgerilip, kórsetkish 29,5% bolǵan edi. Al 2024 jyly bul deńgeı 60%-ǵa, 2025 jyly — 79,8%-ǵa jetse, bıyl — 95,2%-ǵa deıin ósti.
— Igerilý kórsetkishiniń artýy — sońǵy jyldary qabyldanǵan naqty sharalardyń nátıjesi. 2023 jylǵa deıin granttardyń ıgerilý deńgeıi 40%-ǵa da jetpeıtin. Onyń basty sebepteri — qandastar turatyn shet elderde qazaqsha tolyqqandy bilim beretin mektepter tapshylyǵy, bilim berý baǵdarlamalarynyń sáıkessizdigi, Qazaqstan tarıhy pániniń shetelde oqytylmaýy, sondaı-aq Ulttyq biryńǵaı testileýde (UBT) barlyq pánnen shekti ball jınaý talaby edi, — dep túsindirdi qor.
Qor bastamasymen qandas talapkerlerge qatysty birqatar normatıvtik jeńildik kúshine engen. Atap aıtqanda, 2024 jyly qandastar úshin UBT-daǵy ár pán boıynsha shekti ball talaby alynyp tastalsa, 2025 jyldan bastap, oqý saýattylyǵy jáne eki beıindi pán boıynsha ǵana test tapsyratyn boldy.
— Qabyldanǵan sharalar etnıkalyq qazaqtardyń tarıhı Otanynda sapaly joǵary bilim alý múmkindigin aıtarlyqtaı keńeıtti. «Otandastar qory» aldaǵy ýaqytta da qandastardyń bilim alýyna járdemdesý, olardyń beıimdelýi men el ıgiligine qyzmet etýi úshin qajetti jaǵdaı jasaý baǵytyndaǵy jumysyn jalǵastyrady, — dep jazylǵan qor habarynda.
Aıta keteıik, 7 tamyzda bilim granty ıegerleriniń tizimi shyqty. Bıyl 75 myńnan astam talapker elimizdiń joǵary oqý oryndarynda tegin bilim alý múmkindigine ıe boldy.
