Eki mıllıonnan astam azamattyń áleýmettik quqyqtary qalpyna keltirildi

ASTANA. KAZINFORM – Áleýmettik-ekonomıkalyq salada quqyqtyq tártipti qamtamasyz etý boıynsha júıeli qadaǵalaý qurylyp, 2 mıllıonnan astam azamattyń áleýmettik quqyqtary qalpyna keltirildi, dep habarlaıdy Bas prokýratýra.

Prokýrorlar áleýmettik turǵyn úıdi bólý praktıkasyn qaıta qaraýǵa qol jetkizdi. Nátıjesinde 529 jetim bala páterge ıe boldy, taǵy 409-y kezekke turdy.

Psıhıkalyq jáne minez-qulqynyń buzylystary bar balalardy qoldaý salasynda jıi jol beriletin problemalar anyqtaldy. Otbasylarǵa tıisti áleýmettik qoldaý kórsetilmeıtini, járdemaqy tólenbeıtini, ınklıýzıvti jáne túzetý jabdyqtarynyń jetispeıtini belgili boldy. Barlyq buzýshylyq boıynsha qadaǵalaý aktisi engizilip, 4,5 myń balanyń quqyǵy qorǵaldy.

Prokýrorlar memleketke 380 jer ýchaskesin qaıtardy, onyń ishinde 207 áleýmettik nysan – saıabaqtar, balabaqshalar, mektepter men aýrýhanalar salýǵa arnalǵan ýchaskeler bar.

Qurylys salasynda Prezıdenttiń tapsyrmasy boıynsha 2022 jyldan beri iri qalalardaǵy retsiz salynǵan qurylystyń jolyn kesýge baǵyttalǵan júıeli sharalar qabyldanýda. Prokýratýra usynystary negizinde baqylaý kúsheıtilip, qurylys salasy avtomattandyryldy.

- Balyq sharýashylyǵynda da zańsyz shemalar áshkerelendi. Ońtústik jáne shyǵys óńirlerde brakonerlik jolmen aýlanǵan balyqty zańdastyrý, al soltústikte (Pavlodar, Qostanaı, Soltústik Qazaqstan oblystary) shaıannyń jumyrtqasyn zańsyz óndirý faktileri anyqtaldy. Bul derekter boıynsha sotqa deıingi tergep-tekserý amaldary júrgizilýde, - delingen aqparatta.

Jalpy júıeli jáne eleýli buzýshylyqtar boıynsha Úkimetke 9 qadaǵalaý aktisi engizildi. Olardyń negizinde Jol kartalary ázirlenip, quqyqtyq aktilerge ózgerister men tolyqtyrýlar daıyndalýda.

Aıta keteıik, bıyl memlekettik eńbek ınspektorlary 28,4 myńnan astam jumyskerdiń quqyǵyn qorǵady.