Eki lıtrge deıin ruqsat: EO elderinde qol júgimen suıyqtyq alyp ótý erejeleri ózgeredi

ASTANA. KAZINFORM — Eýropalyq komıssııa qol júgimen suıyqtyq alyp ótý erejelerin jeńildetý týraly jarııalady: endi jolaýshylar ózimen birge eki lıtrge deıingi kólemdegi suıyqtyq qutylaryn alyp óte alady, dep jazdy AZÁRTADJ.

AZÁRTADJ habarlaǵandaı, bul jańa erejeler EO bekitken arnaıy skanerler ornatylǵan áýejaılarda ǵana kúshine enedi.

Eýrokomıssııanyń baspasóz hatshysy Anna-Kaısa Itkonen bul jańa júıege birtindep kóshý josparlanyp otyrǵanyn jáne jolaýshylarǵa aqparat berýge áýejaılardyń ózi jaýapty ekenin atap ótti.

Mundaı jaǵdaı saıahatshylar arasynda túsinbeýshilik týǵyzýy múmkin, ásirese ushyp shyǵý jáne keri qaıtý kezinde ártúrli talaptar qoldanylatyn bolsa. Mysaly, Mılan qalasyndaǵy Malpensa áýejaıynyń 1-termınalynda eki lıtrlik qutylarǵa ruqsat berilse, 2-termınalynda — ázirge joq.

Qazirgi ýaqytta tek brıtandyq Smiths Detection kompanııasy shyǵarǵan bir ǵana skaner túrine ruqsat berilgen. Azamattyq avıatsııa máseleleri jónindegi Eýropalyq konferentsııa (ECAC) basqa óndirýshilerdiń jabdyqtaryn synaqtan ótkizip jatyr. Sertıfıkattaý aıaqtalǵannan keıin, Eýropalyq komıssııa skanerler tizimin keńeıtý múmkindigin qarastyrady.

Eske sala keteıik, buǵan deıin Eýropa áýejaılarynda qol júgindegi suıyqtyqqa qatysty shekteýler jeńildeýi múmkin ekenin jazǵan edik.