Eki kúnde izdeýde júrgen 280 qylmysker ustaldy

ASTANA. KAZINFORM – Іshki ister mınıstrligi joǵalǵan adamdardyń ornalasqan jerin anyqtaý jáne izdeýde júrgen adamdardy ustaý boıynsha jedel-profılaktıkalyq is-shara ótkizdi, dep habarlaıdy Polisia.kz.

Eki kún ishinde polıtsııa izdeýde júrgen 280 qylmyskerdi ustady, onyń ishinde: – kisi óltirgeni úshin – 9; – densaýlyqqa aýyr zııan keltirgeni úshin – 4; – qaraqshylyq shabýyldar úshin – 5; – tonaý úshin – 7; – esirtki qylmysy úshin – 19. Respýblıkadan tys jerlerde 33 qylmysker quryqtalyp, al basqa memleketterdiń suraýymen 145 adam qamaýǵa alyndy.

Armenııanyń Noemberıan aýdanynyń aýmaǵynda 36 jastaǵy Qazaqstan azamaty ustaldy. Ol qyrkúıek aıynyń sońynda Petropavlda qala turǵynyna pyshaq jaraqatyn salyp, ómirine qastandyq jasaǵan.

Pavlodar oblysy polıtsııasynyń jedel-izdestirý toby Reseı Federatsııasynyń Orel qalasynda 42 jastaǵy qazaqstandyqty ustady. Qaskóı 2017 jyly óńirlik JShS-niń birine dızel otynyn jetkizýge ýáde berip, 50 mln teńgeni ıemdengen.

Almaty polıtsııasy Tashkent oblysynyń MІІB-men izdeýde júrgen 28 jastaǵy Ózbekstan azamatyn ustady. Áıel 2015 jyldyń mamyr aıynda óziniń kámeletke tolmaǵan qyzyn óltirgen. Qazaqstan ІІM Interpolynyń suraýy boıynsha Germanııanyń Nıýrnberg qalasynda elimizdiń 42 jastaǵy azamaty ustaldy. Ol naýryz aıynyń sońynda astyq jetkizýge ýáde berip, Pavlodarda sheteldiktiń 244 myń AQSh dollaryn jymqyrǵan.

Abaı oblysynyń PD qyzmetkerleri izdeýde júrgen semeılik turǵyndardy qalanyń ózinde quryqtady. Olar 2021 jyly UQT kómegimen metall zaýytynan quramynda altyny bar materıaldy urlap áketken.

Sonymen qatar júrgizilgen jumys barysynda polıtsııa qyzmetkerleri habar-osharsyz ketken 53 adamnyń ornalasqan jerin anyqtady.