Eki kúnde esirtki saýdasymen aınalysqan 228 ózbekstandyq jaýapqa tartyldy
TAShKENT. KAZINFORM – 3-4 aqpan aralyǵynda Ózbekstanda «Qoradorı» («Qara kóknár») operatsııasynyń birinshi kezeńi ótti, dep habarlaıdy Kazinform agenttiginiń menshikti tilshisi.
Operatsııa Memlekettik qaýipsizdik qyzmeti jáne Іshki ister mınıstrliginiń mamandarymen birlesip uıymdastyryldy. Onyń nátıjesinde 112,3 keli esirtki men 8 601 dana psıhotroptyq preparattar tárkilendi. Buǵan qosa, jedel aldyn alý is-sharasy barysynda 175 pyshaq, 24 kastet jáne 77 atys qarýy aınalymnan alyndy.
Aldyn ala málimetke saı, esirtki saýdasynan túsken 287,5 myń dollar qarajat anyqtaldy.
«Qoradorı» operatsııasynyń qorytyndysy boıynsha 222 qylmystyq is qozǵaldy. Atap aıtqanda, 228 adam qylmystyq jaýapkershilikke tartylsa, taǵy 64 azamattyń isi ákimshilik sottarǵa tústi.
Munymen birge, izdeýde júrgen 47 adam ustalyp, 230-dan astam azamatqa eskertý jasaldy.
Eske salaıyq, byltyr Ózbekstannyń Ortalyq banki alaıaqtar urlaǵan 9,5 mlrd sýmdy (shamamen $732 myń) buǵattap tastaǵan.
Sondaı-aq bir jylda bala tárbıesine selqos qaraǵan 45 myńǵa jýyq ózbekstandyq ata-ana jaýapqa tartyldy.