Eki kúnde 743 zańbuzýshylyq: jambyldyq polıtseıler jolaýshylar tasymalyna tekserýdi kúsheıtti

TARAZ. KAZINFORM – Profılaktıkalyq reıdter barysynda tártip saqshylary júrgizýshilerdiń jolaýshylar men júk tasymaldaý erejelerin saqtaýyna, kólik quraldarynyń tehnıkalyq jaı-kúıine jáne ruqsat qujattarynyń bolýyna basa nazar aýdardy. Bul týraly Jambyl oblystyq Polıtsııa departamenti málim etti.

Polıtseıler qalaaralyq avtojoldarda, avtovokzaldar mańynda jáne jolaýshylar aǵyny jıi júretin baǵyttarda tekserý júrgizýde. Reıd barysynda tejeý júıesi, rýldik basqarý, shınalar, jaryq qurylǵylary, tahograftardyń bolýy men jaramdylyǵy tekseriledi.

Sonymen qatar, júrgizýshilerdiń eńbek jáne demalys tártibin saqtaýyna da baqylaý júrgizilýde.

- Eki kún ishinde tehnıkalyq aqaýy bar kólikti paıdalanýǵa shyǵarǵany jáne kólik paıdalaný erejelerin buzǵany úshin 11 laýazymdy tulǵa ákimshilik jaýapkershilikke tartyldy.

Shara barysynda oblys boıynsha barlyǵy 743 ákimshilik quqyq buzýshylyq anyqtaldy. Onyń ishinde 19 júrgizýshi kólikti mas kúıinde basqarǵan. Jol belgileri men tańbalar talaptaryn saqtamaǵany úshin 211 júrgizýshige, manevr jasaý erejesin buzǵany úshin 81 júrgizýshige aıyppul salyndy, - dep jazdy departamentten.

Jolaýshylardy tasymaldaý talaptary men qaýipsizdik beldigin paıdalanbaǵany úshin 85 júrgizýshi, zańsyz tasymaldaýmen aınalysqan 2 júrgizýshi jaýapqa tartyldy. Sondaı-aq, jolaýshylarǵa taksı qyzmetin únemi tyqpalap usynǵan eki júrgizýshi de ákimshilik jaýapqa tartyldy.

Zańsyz qaıta jabdyqtalǵan 36 kólik anyqtaldy. Onyń ishinde 4 avtobýs júrgizýshisi kólikti jatyn orynǵa aınaldyryp, jolaýshylar tasymalymen aınalysqan.

Іs-shara aıasynda 71 kólik arnaıy aıyp turaǵyna qoıyldy.

Jambyl oblysy Polıtsııa departamenti barlyq júrgizýshiler men tasymaldaý kompanııalaryn jolaýshylardyń qaýipsizdigine jaýapkershilikpen qaraýǵa shaqyrady. 

Aıta keteıik, Jambyl oblysynda tyıym salynǵan dinı materıal taratqan top sottaldy.