Eki komandanyń deńgeıi eki bólek: «Qaırat» bapkeri Almatydaǵy oıyn týraly aıtty

ALMATY. KAZINFORM — «Qaırat» fýtbol klýbynyń bas bapkeri komandasynyń Chempıondar lıgasynda «Realdan» iri eseppen jeńilgeninen keıin pikir bildirdi, dep habarlaıdy Kazinform tilshisi.

Ýrazbahtın eki komandanyń deńgeıi eki bólek ekenin aıtty. Ol óz kezeginde «Real Madrıd» Eýropanyń eń úzdik klýby dep tanylsa, «Qaırat» 100-dikke kirmeıtinin atap ótti. 

— Bizdiń quramnyń quny — 12 mıllıon eýro, «Real Madrıd» komandasynyń quny — 1,4 mıllıard eýro. Olardyń bir oıynshysy búkil lıgamyzdyń qunymen birdeı. Biz qaı jerde turǵanymyzdy túsinemiz. Iá, jeńilý kóńil kónshitpeıdi, biraq biz Mbappege qalaı tótep bere alamyz?! Degenmen, «Real» sııaqty klýbtarmen básekelestik arqyly biz tek oıynymyzdy jaqsarta alamyz. Bizdiń fýtbolshalar úzdik qarsylastarmen oınaǵannyń paıdasyn kóredi. Biz osyndaı jeńilister arqyly kúsheıemiz. Endigi maqsatymyz — eýropalyq dodalardyń negizgi kezeńderine múmkindiginshe jıirek joldama alý, osylaısha mundaı sýperklýbtar jyl saıyn osynda kele alady. Qazaqstanda mundaı oıyndar kóp bolǵan saıyn elimiz ben fýtbolymyz soǵurlym kóp paıdaǵa keneledi, - dedi Rafael Ýrazbahtın. 

Aıta ketý kerek, Qaırattyń oıynynda gol soǵatyn sátter de boldy, ony tipti Ispanııa quramasynyń bas bapkeri Habı Alonso da atap ótti. 

— Bes mınýtta úsh gol jiberip almaǵanymyzǵa qazirdiń ózinde qýanyshtymyn. Biz uıymshyl bolyp kórinýge tyrystyq, urymtal sátter de boldy. Qarsylastyń joǵary deńgeıde ekenin aıtýdyń ózi artyq. Olar óte jyldam ári madrıdtik oıynshylardyń tehnıkalary joǵary. Biz eshqashan mundaı jyldamdyqpen oınaǵan emespiz, — dep túsindirdi Ýrazbahtın.