Eki elge ortaq batyr: Túrkııa qazaq bitimgeri Qaırat Qudabaevty eske aldy
ASTANA. KAZINFORM — Elimizdiń Qorǵanys mınıstri, avıatsııa general-leıtenanty Dáýren Qosanov Túrkııaǵa jumys saparymen baryp, eki eldiń áskerı yntymaqtastyǵy aıasynda uıymdastyrylǵan is-sharalarǵa qatysty, dep habarlaıdy Kazinform agenttiginiń menshikti tilshisi.
Qorǵanys mınıstriniń bul sapary ádettegi dıplomatııalyq barys-kelisten bólek: eki baýyrlas memleket arasyndaǵy tereń áskerı dostyqtyń belgisin kórsetti.
Sapar eske alýdan bastalady
QR Qorǵanys mınıstri, avıatsııa general-leıtenanty Dáýren Qosanovtyń Túrkııaǵa sapary «Anytkabyr» memorıaldyq keshenindegi Mustafa Kemal Atatúrik eskertkishine gúl shoǵyn qoıý rásiminen bastaldy. Dál osy jerde, Túrkııa Respýblıkasynyń negizin qalaýshynyń qabirinde mınıstr qazirgi Túrkııaǵa jol ashqan uly reformator marshaldyń rýhyna qurmet kórsetti.
Jańa múmkindikterdi ashatyn kelissózder
Rásimnen keıin Dáýren Qosanov pen Túrkııanyń Ulttyq qorǵanys mınıstri ıAshar Gıýler arasynda kelissózder ótti. Qorǵanys mınıstrleri áskerı ǵylym men bilim berýden bastap, birlesken áskerı-tehnıkalyq jobalarǵa deıingi ekijaqty yntymaqtastyqtyń bolashaǵyn talqylady. Túrkııa Qarýly Kúshteri Bas shtabynyń bastyǵymen kezdesý dıalogtyń logıkalyq jalǵasy boldy.
Belgili bolǵandaı, eki eldiń qorǵanys mınıstrlikteriniń áskerı ǵylym, bilim berý, jaýyngerlik daıyndyq jáne áskerı-tehnıkalyq máseleler salasyndaǵy ózara is-qımyly qoldanystaǵy ekijaqty áskerı yntymaqtastyq týraly kelisimge negizdelgen.
Erlikpen qaza tapqan ofıtserdi eske alý
Sapardyń eń mańyzdy sáti Túrkııa Ulttyq qorǵanys ýnıversıtetiniń Qurlyq áskerleriniń áskerı akademııasyna (Milli Savunma Üniversitesi Kara Harp Okulu) barý boldy — bul jerde bir kezderi qazaqstandyq ofıtser ári beıbitshilikti saqtaýshy Qaırat Qudabaev oqyǵan.
Qaırat 1993 jyly oqýǵa jiberilgen alǵashqy qazaqstandyq áskerı qyzmetshilerdiń biri. Onyń mansaby 2005 jyldyń qańtarynda Iraktaǵy Qazbat mıssııasy kezinde kezdeısoq oq-dári jarylysymen qaıǵyly aıaqtaldy. Ol óz ómirin qurban etip, áriptesterin qutqardy. Batyldyǵy úshin ol І dárejeli «Aıbyn» ordenimen (qaza tapqannan keıin) jáne birneshe halyqaralyq marapattarmen marapattaldy.
Endi akademııada osy qazaq batyrynyń erligine arnalǵan eskertkish taqta ashyldy. Dál osy jerde onyń ofıtser retindegi minezi qalyptasqan edi.
Otbasy jáne jas kýrsanttar: shabyttandyratyn estelik
Saltanatty sharaǵa Q.Qudabaevtyń jubaıy Ásem Túrkistanova, eki qyzy Ámına men Mádına Qudabaevalar jáne Túrkııada oqıtyn qazaqstandyq kýrsanttar qatysty. Oqý ornynyń basshylyǵy munda Qaırat Qudabaev týraly estelikter áli kúnge umytylmaǵanyn aıtty. Bul jerde bir kezde Atatúriktiń ózi oqyǵan eken.
Kýrsanttar sonymen qatar maqtanysh sezimderin bildirdi: joldastary úshin janyn bergen ofıtser oqyǵan sol oqý ornynda oqý — olar úshin ári qurmet, ári jaýapkershilik.
Akademııada oqıtyn Qazaqstannan kelgen Ólke Erdaly bir kezderi jerles batyr oqyǵan osy oqý ornynda bilim alǵanyn maqtanatynyn atap ótti.
— Búgingi is-shara Irakta ásekrı qyzmet etip júrgende qaza tapqan kapıtan Qaırat Tóleýhanuly Qudabaevqa arnalǵan eskertkish taqtanyń ashylýyna arnalǵan. Ol bizdiń akademııamyzda oqyǵan. Men bir kezderi batyr aǵamyz tabaldyryǵyn attap, tálimin kórgen oqý ornynda bilim alyp jatqanyma qýanyshtymyn jáne maqtanamyn, — dedi ol.
Eldiń bolashaq qorǵaýshylarymen bolǵan áńgime
Saparynyń sońynda elimizdiń Qorǵanys mınıstri Túrkııada oqyp jatqan otandyq kýrsanttarmen kezdesti. Olardyń oqýy, turmys jaǵdaılary jáne bolashaq qyzmeti týraly áńgimeleskennen keıin, ol halyqaralyq bilikti ofıtserlerdi daıarlaýdyń mańyzdylyǵyn atap ótti. Kýrsanttardyń arasynda áskerı medıtsına mamandyǵyn senimdi túrde tańdaǵan jas qazaqstandyq qyzdar da bar ekeni atalyp ótti.
Mınıstr avıatsııa general-leıtenanty Dáýren Qosanovtyń Túrkııaǵa sapary áskerı yntymaqtastyqty nyǵaıtýǵa baǵyttalǵan qadam ǵana emes, sonymen qatar beıbitshiliktiń qundylyǵy men jańa urpaqqa úlgi bolatyn batyrlardy eske salýdyń mańyzdy qadamy boldy. Kapıtan Qaırat Qudabaevtyń esimi onyń otbasynyń, áriptes sarbazdardyń, jas kýrsanttardyń jáne onyń erlik isterine degen taǵzym aıasyna uıysqan eki el halqynyń júreginde máńgi saqtalady.
Eske sala ketsek, buǵan deıin Túrkııa prezıdenti qazaq ofıtserine dıplom tabystaǵanyn habarlaǵan edik.
Sondaı-aq Qazaqstan men Túrkııa áskerı múliktiń áýe tranzıtiniń tártibin belgiledi.