Eki eldiń prezıdenti BAQ ókilderi úshin brıfıng ótkizdi
ASTANA. KAZINFORM — Qazaqstan men Rýanda prezıdentteri BAQ ókilderi úshin brıfıng ótkizdi. Bul týraly Aqorda málim etti.
Memleket basshysy Prezıdent Pol Kagameniń Qazaqstanǵa resmı saparmen kelgenine rızashylyǵyn bildirip, elderimiz úshin mán-mańyzy zor kelissózder júrgizilgenin atap ótti. Onyń aıtýynsha, Afrıka qurlyǵynyń halyqaralyq yqpaly jyldan jylǵa kúsheıip keledi. Qazaqstan osy aımaqtaǵy eldermen tyǵyz qarym-qatynas ornatýǵa erekshe mán berip otyr.
– Biz Rýandany Afrıkadaǵy senimdi seriktesimizdiń biri retinde qarastyramyz. Sondaı-aq ózara áriptestikti odan ári nyǵaıtýǵa múddelimiz. Búgingi kezdesý mazmundy ári maǵynaly boldy. Biz ekijaqty yntymaqtastyqty kúsheıtý joldaryn talqyladyq. Naqty kelisimderge qol jetkizdik. Eki el arasyndaǵy saıası dıalogty damytýǵa ýaǵdalastyq. Aldaǵy ýaqytta Syrtqy ister mınıstrlikteri joǵary deńgeıdegi kezdesýler ótkizetin boldy, – dedi Qasym-Jomart Toqaev.
Memleket basshysy bıyl Qazaqstan men Rýanda dıplomatııalyq jáne qyzmettik tólqujat ıelerin vızalyq talaptardan bosatýǵa keliskenine toqtaldy.
Budan bólek, memleketter basshylary parlamentaralyq dıplomatııa máselesin pysyqtaǵanyn jetkizdi Sondaı-aq kólik-logıstıka jáne saýda salalarynda birlesken jumys toptaryn qurý týraly kelisim jasady. Qazaqstan Prezıdenti muny saýda-ekonomıkalyq qatynastardy odan ári damytýdyń tetigi sanaıdy.
– Bul rette halyqaralyq dálizderdiń múmkindigin talqyladyq. Kelissóz barysynda azyq-túlik qaýipsizdigin qamtamasyz etý máselesin pysyqtadyq. Qazaqstannyń aýyl sharýashylyǵy ónimderin Afrıka qurlyǵyna tasymaldaý joldaryn qarastyrdyq. Elderimiz ozyq tehnologııa, jasandy ıntellekt jáne ǵarysh salasynda aıtarlyqtaı tájirıbe jınaqtady. Biz tsıfrlandyrý jáne kıberqaýipsizdik máselelerine qatysty ortaq jobalardy qolǵa alamyz dep kelistik. Ǵarysh keńistigin birlesip ıgerý jóninde ýaǵdalastyqqa qol jetkizdik. Mundaı qadam memlekettik qyzmet pen bıznestiń tıimdiligin arttyrýǵa septigin tıgizedi. Aqparattyq qaýipsizdikti kúsheıtýge múmkindik beredi, – dedi Prezıdent.
Qasym-Jomart Toqaev Qazaqstan men Rýanda jasyl energetıka salasyn órkendetip, tabıǵı resýrstardy tıimdi paıdalanýǵa múddeli ekenin aıtty.
Osyǵan oraı qos memleket birlesken jobalardy júzege asyrýǵa nıetti. Bul ýaǵdalastyqtar saýda-sattyq kólemin arttyrýǵa jol ashady. Sonymen qatar eki eldiń ınvestıtsııalyq yqpaldastyǵyna tyń serpin beredi.
– Búginde Astana men Kıgalıdiń halyqaralyq qarjy ortalyqtary arasynda tyǵyz baılanys bar. Biz jahandyq qarjy naryǵyndaǵy osy baılanysty odan ári nyǵaıtýǵa kelistik. Klımattyń ózgerýine qarsy kúres jáne qorshaǵan ortany qorǵaý máseleleri de nazardan tys qalǵan joq. Rýandanyń klımatty saqtaý baǵytynda mol tájirıbesi bar. Sonyń arqasynda jahandyq jobalarǵa zor úles qosyp keledi. Osy rette tájirıbe almasýdyń ózekti ekenin atap óttik. Halyqaralyq konventsııalar men kelisimder aıasynda ekologııa máselelerin sheshý úshin kúsh biriktirý joldaryn talqyladyq, – dedi Memleket basshysy.
Búgingi kelissózder kezinde mádenıet, bilim-ǵylym salalaryndaǵy yntymaqtastyqqa da erekshe nazar aýdaryldy. Atap aıtqanda, prezıdentter akademııalyq baılanysty damytýǵa, stýdent almasýǵa, sondaı-aq, birlesken ǵylymı zertteýler júrgizýge kelisti.
Qasym-Jomart Toqaev Pol Kagameni álemdik saıasatta mol tájirıbesi, bedeli bar Prezıdent retinde atap ótip, jahandyq máseleler jóninde pikir almasqanyna toqtaldy.
– Eki eldiń halyqaralyq túıtkilderge qatysty ustanymdary ortaq dep aıtýǵa bolady. Biz jahandyq daǵdarystyń bárin tek dıplomatııalyq jolmen sheshý kerek dep esepteımiz. Beıbit kelissózder júrgizýdi qoldaımyz. Buǵan qosa, halyqaralyq uıymdar aıasynda ózara yqpaldastyqty kúsheıtýge ýaǵdalastyq. Bastamalarymyz boıynsha bir-birimizge qoldaý kórsetýge kelistik. Prezıdent Kagame myrzanyń elimizge resmı saparynyń tarıhı mańyzy bar. Biz ekijaqty baılanysty damytýǵa, túrli saladaǵy yntymaqtastyqty keńeıtýge múddeli ekenimizdi rastadyq. Búgingi kelissózdiń nátıjesi – sonyń aıqyn dáleli. Endi osy kelisimderdi sapaly júzege asyrýymyz kerek, – dedi Memleket basshysy.
Óz kezeginde Pol Kagame búgingi kelissózderdiń qorytyndysyn joǵary baǵalady.
– Qazaqstan Prezıdentimen óte nátıjeli kelissóz júrgizdik. Elderimiz arasyndaǵy berik dostyq ózara seriktestigimizdi odan ári nyǵaıtýǵa negiz bolady. Kelisimderge qol qoıý arqyly yntymaqtastyq múmkindikterin arttyrýǵa nıettimiz. Eki memlekettiń saýda, tehnologııa jáne aýyl sharýashylyǵy salalarynda bir-birinen úıreneri kóp. Biz «Samuryq-Qazyna» AQ men Rwanda Mines, Petroleum and Gas Board arasynda kelisim jasalýyn quptaımyz. Rýanda Qazaqstannyń energetıka, taý-ken ónerkásibi jáne mıneraldardy óńdeý salalaryndaǵy ınnovatsııalaryn ıgerý arqyly aıtarlyqtaı paıdaǵa kenele alady, – dedi Rýanda Prezıdenti.
Buǵan deıin habarlanǵandaı, Qazaqstan men Rýanda Prezıdentteri birqatar saladaǵy qarym-qatynasty damytý máselesin talqylady.