Eki el prezıdentteri Sıannan Tashkentke kelgen konteınerlik poıyzǵa qatysty saltanatty sharany tamashalady

ASTANA. KAZINFORM – Eki el prezıdentteri Qytaı – Qazaqstan – Ózbekstan baǵytyndaǵy konteınerlik poıyzdyń Sıannan Tashkentke kelýine oraı uıymdastyrylǵan saltanatty sharaǵa qatysty. Bul týraly Aqordanyń baspasóz qyzmeti málim etti. 

Qazaqstannyń Kólik mınıstri Marat Qarabaev pen Ózbekstannyń Kólik mınıstri Ilhom Makhamov eki eldiń kólik-tranzıt múmkindikterin keńeıtý baǵytynda júrgizilgen birlesken jumystar týraly baıandady.

Bıylǵy sáýir aıynda Hıýa qalasynda Qytaı — Qazaqstan — Ózbekstan baǵytynda júk tasymalyn uıymdastyrý jáne Trans-Aýǵan baǵytyn damytý boıynsha ýaǵdalastyqtarǵa qol jetkizilgen bolatyn. Sonyń sheńberinde júkterdi jetkizý merzimi qysqardy. Konteınerli poıyz 4486 shaqyrym joldy 5 táýliktiń ishinde júrip ótti. Bul — rekordtyq kórsetkish. Júk poıyzy Sıan qalasyndaǵy porttan Qazaqstan aýmaǵy arqyly Tashkentke jóneltildi.

«Elimizdiń Qytaıdaǵy termınaldarynyń múmkindikterin paıdalaný jáne Qazaqstan men Ózbekstannyń temirjol ákimshilikteriniń shekara mańyndaǵy ınfraqurylymdy nyǵaıtý boıynsha nátıjeli yntymaqtastyǵy tasymaldaý merzimin qysqartýǵa yqpal etti. Byltyr eki el arasyndaǵy júk tasymalynyń kólemi 31 mıllıon tonnadan asyp, 2022 jylmen salystyrǵanda 17,2 paıyzǵa ulǵaıdy», — delingen habarlamada.