Eki el arasyndaǵy taýar aınalymy 4 mıllıard dollardan asady — Qasym-Jomart Toqaev

TAShKENT. KAZINFORM — Qasym-Jomart Toqaev Shavkat Mırzıeevtiń ekijaqty qarym-qatynasty jańa sapaly deńgeıge kóterýge jáne álemniń Ortalyq Azııany dostyq pen birliktiń aımaǵy retinde tanýyna úlken úles qosqanyn atap ótti. Bul týraly Aqordanyń baspasóz qyzmeti habarlady. 

— Prezıdent Mırzıeevtiń qýatty basshylyǵymen Ózbekstan kóptegen salada tamasha jetistikterge jetti, dúnıe júzine tabysty damyp kele jatqan el retinde tanyldy. Aýqymdy reformalardyń nátıjesi ornyqty ekonomıkalyq ósimnen, halyqtyń ál-aýqatynyń artýynan, qalalardaǵy qarqyndy ózgeristerden jáne qoǵamnyń barlyq baǵytyndaǵy sapaly damýdan kórinedi. Ózbekstan álemdik arenadaǵy óziniń ornyn nyǵaıtyp, halyqaralyq jáne óńirlik qaýipsizdik pen yntymaqtastyqty qamtamasyz etýge aıtarlyqtaı úles qosty. Qazaqstandyqtar baýyrlas ózbek halqyna shynaıy qoldaý kórsetip, jetistikterine qýanady, — dedi Memleket basshysy.

Prezıdent Qazaqstan men Ózbekstan tutas aımaqtyń damýyn kózdeıtin óńirlik berik strategııalyq alıans qalyptastyrǵanyn aıtty. Sondaı-aq kelissózder barysynda ekijaqty kún tártibiniń keń kólemdi máseleleri talqylanyp, elderimizdiń san qyrly yqpaldastyǵyn odan ári damytýdyń basymdyqtary belgilengenine toqtaldy.

— Negizgi qorytyndy — ózara ýaǵdalastyqtar jáne strategııalyq seriktestik pen odaqtastyqty nyǵaıtý men tereńdetýge kúsh salý. Ortaq maqsatqa qol jetkizýde ekijaqty saýdanyń orny erekshe. Keıingi kezeńde eki el arasyndaǵy taýar aınalymynyń jyl saıynǵy kólemi turaqty túrde 4 mıllıard dollardan asa qarjyny quraıdy. Bul — úkimetterimizdiń dáıekti jumysy men bıznestiń tikeleı dıalogynyń nátıjesi. Degenmen saýda-sattyqty arttyrýǵa áli de aıtarlyqtaı áleýet bar, — dedi ol. 

Aıta ketelik prezıdentter kelissózderdiń jáne Qazaqstan men Ózbekstan Joǵary memleketaralyq keńesi ekinshi otyrysynyń qorytyndysy boıynsha Birlesken málimdeme qabyldaǵan edi.