Eki buǵanasy synǵan. Pavlodarda 2 jasar qyzdy urdy degen kúdikpen ógeı áke ustaldy

PAVLODAR. KAZINFORM — Anasy qyzyn aýrýhanaǵa alǵash ákelgende tósekten qulap qaldy dep habarlaǵan. Alaıda bir táýlikten soń ol dárigerlerden balasynyń kógergen jerlerin túsirip, tirkeýdi suraǵan.

Oblystyq balalar aýrýhanasyna denesinde jaraqaty bar 2 jasar qyz bala túsken. Anasy balasynyń arqasy aýyryp tur dep aıtqan. Dárigerler teksere kele jetkinshektiń eki buǵanasy birdeı synǵanyn anyqtady.

— Rentgenge túsirgenimizde qyzdyń eki buǵanasy da synǵany belgili boldy, biraq buǵanasy ornynan shyqpaǵan. Buǵan qosa mańdaıynda buryn kógergen jeri baıqaldy. Anasynan suraǵanymda oınap júrip aýyrtyp aldy dep jaýap berdi. Kóp balalar júre bastaǵanda qulap, soǵylyp, denelerin kógertip jatatyn jaǵdaılar jıi kezdesedi, — deıdi balalar aýrýhanasynyń travmatolog dárigeri Sergeı Samets.

Bir táýlikten soń anasy aýrýhanaǵa qaıta kelip, dárigerlerden qyzynyń kógergen jerlerin túsirip, tirkeýdi ótingen. Belgili bolǵandaı, balaǵa álgi jaraqattardy úıinde birge turatyn ógeı ákesi salǵan. Ol qyzdy qatty uryp jibergen. Saldarynan jetkinshektiń buǵanalary synǵan.

— Densaýlyqqa qasaqana zııan keltirý deregi boıynsha qylmystyq is qozǵaldy. Kúdikti ustalyp, Pavlodar qalasyndaǵy ýaqytsha qamaý ornyna ornalastyryldy, — dep habarlady Pavlodar oblysy polıtsııa departamentiniń baspasóz qyzmetinen.

Qazir eki jasar qyz ambýlatorııalyq em qabyldap jatyr. Dárigerler jaǵdaıyn turaqty dep baǵalady.

Eske sala keteıik, pavlodarlyq pansıonatta múgedektigi bar qarttardy azaptap kelgenin habarlaǵan edik.