Eki baýyrlas memleket Kaspıı teńizin saqtaýda ózara is-qımyldy kúsheıtý kerek
ASTANA. KAZINFORM — Qazaqstan men Iran Kaspıı aımaǵynda belsendi yntymaqtastyqty órbitip jatyr. Bul týraly Iran Islam Respýblıkasynyń Prezıdenti Masýd Pezeshkıan QR Prezıdentiniń Teleradıokeshenine bergen eksklıýzıvti suhbatynda aıtty.
Iran prezıdenti Kaspıı teńizi týraly konventsııa Kaspıı mańy elderi arasyndaǵy yntymaqtastyqtyń negizi sanalatynyn aıtty.
— Óńirdegi eki baýyrlas memleket retinde Kaspıı teńizin saqtaýda ózara is-qımyldy kúsheıtýimiz kerek. Onyń ekologııasyna, sý resýrstaryna erekshe mán berip, teńiz arqyly iske asatyn saýda-ekonomıkalyq qyzmettiń turaqtylyǵyna nazar aýdarý mańyzdy, — dedi ol.
Iran kóshbasshysynyń sózinshe, eger ashyq jáne túsinikti formatta áreket etsek, Kaspıı teńizin saqtap qalýǵa múmkindik bar. Onyń shyǵys pen batysqa, soltústik pen ońtústikke baǵyttalǵan saýda-ekonomıkalyq dáliz retindegi mańyzy zor. Birlesken qadamdar teńizdiń tabıǵı ortasyn saqtaýǵa múmkindik beredi.
«Qazirgi kezde Kaspıı mańy elderi teńizdiń ekologııalyq balansyn saqtap otyr ma? Bul turǵyda ózgerister qajet pe», degen saýalǵa bylaısha jaýap berdi.
— Biz ómir súrip jatqan álemdi saqtaý úshin teńiz salasynyń mamandary men sarapshylary biryńǵaı kózqaras jáne ortaq ǵylymı tásilmen jumys isteýi óte mańyzdy. Mundaı qadamdar iske assa, saıasatkerler men bıznes ókilderi jáne múddeli taraptar ǵylymǵa súıenip, osy óńirdiń ekologııasyna qamqorlyqpen qaraý baǵytynda tıisti sheshim qabyldaı alady. Eger tabıǵatqa qatysty ǵylymı negizsiz sharalar qabyldasaq, klımattyń ózgerýin eskermeı áreket etsek, onda bolashaqta Kaspıı teńizi mańynda ornalasqan elderge eleýli zııan keltirýimiz múmkin.
Cuqbattyń tolyq nusqasyn myna siltemeden oqı alasyz.