Eki balasyn jastyqpen tunshyqtyryp óltirgen kelinshek májbúrli túrde emdeledi
AQTÓBE. KAZINFORM — Tórkinine emdelýge kelip, ul men qyzyn tunshyqtyryp óltirgen 29 jastaǵy kelinshek májbúrli túrde em qabyldaýyn jalǵastyrady. Búgin sot úkim shyǵardy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda 29 jastaǵy kelinshekke qatysty sot otyrysy jalǵasty. Búgin basty sot talqylaýynda kúıeýi, ákesi men aǵasy mán-jaıdy aıtyp berdi. Qylmystyq kodekstiń 99-baby 3-bóligi boıynsha aıyptalǵan áıel bir kezderi mektepti úzdik aıaqtap, kolledjdi, keıin eki joǵary oqý ornyn úzdik dıplommen támamdaǵan. Sonymen birge sportpen shuǵyldanyp, taekvondodan oblys jeńimpazy da bolǵan. Turmysqa shyqqan soń Atyraýdyń Saǵyz aýylda turyp, sonda eki balaly boldy. Eki balasynda de kesir tiligimen bosanyp, túrli em qabyldaǵan.
— Qyzymdy úıge ákelip, ımamǵa, dárigerge qarattym. Ol emnen soń tynysh uıyqtady. Keıin men jumysqa kettim. Sol kezde telefon arqyly habarlasyp otyratyn edim. Mazasyz kúıin estigende dárisin ishkizý kerek ekenin aıttym. Sodan eki saǵat mazalamadym. Sol aralyqta ózi qońyraý shalyp, «balalardy tunshyqtyryp tastadym» dedi. Bireýdi kinálaı almaımyz, — dedi sottalýshynyń ákesi.
Sot otyrysynda sot saraptamasy da oqyldy. Onda oqıǵa bolǵan kúni sottalýshynyń aqyl-esin bilmegeni týraly aıtylǵan.
— Paranoıdty shızofrenııa aǵymnyń basqa túri, turaqty sýıtsıdtik tendentsııalary bar depressııalyq paranoıdty sındrom túrindegi sozylmaly psıhıkalyq buzylysqa shaldyqqan. Ózine jáne qoǵamǵa qaýiptiliktiń klınıkalyq jáne psıhopatologııalyq faktorlary anyqtalady. Sol sebepti jiti baqylanatyn mamandandyrylǵan psıhıatrııalyq aýrýhanaǵa májbúrli túrde emdeýge usynady. Óziniń is-áreketterin uǵyný jáne olardy basqarý, tolyq kólemde jaýap berý qabletinen aıyrylǵan. Óz is-áreketterine jaýap berip, olardy basqara almaıdy, — dep oqydy sýdıa Nurlan Baqtyǵalıev.
Sottalýshy Qylmystyq kodekstiń 99-baby 3-bóliginde kózdelgen qylmystyq quqyqbuzýshylyqty esi durys emes kúıde jasaǵany úshin qylmystyq jaýaptan bosatyldy.
Sonymen birge Qylmystyq kodekstiń 93-baby 1-bóligi 2-tarmaǵyna sáıkes jiti baqylanatyn mamandandyrylǵan túrindegi psıtıatrııalyq aýrýhanada májbúrlep emdeý taǵaıyndaldy.
Aıta keteıik, oqıǵa bıyl 23 naýryz kúni Aqtóbe oblysy Muǵaljar aýdany Qandyaǵash qalasynda boldy. 29 jastaǵy áıel 2022 jylǵy uly men 2024 jylǵy qyzyn tunshyqtyryp óltirgen.