Eki balasy bar áıelge berilgen 20 táýlik qamaý jazasy aıyppulǵa aýystyryldy
ASTANA. KAZINFORM — Qazaqstanda prokýrordyń aktisi boıynsha eki ákimshilik quqyq buzýshylyq úshin taǵaıyndalǵan qamaýǵa alý jazalarynyń kúshi joıyldy. Sot áıelge berilgen jazany ákimshilik aıyppulǵa aýystyrdy.
Ákimshilik quqyq buzýshylyq týraly zańnamada keıbir sanattaǵy adamdarǵa ákimshilik qamaýǵa alýdy qoldanýǵa tyıym salynǵan. Qazaqstan Respýblıkasynyń Ákimshilik quqyq buzýshylyq týraly kodeksiniń (QR ÁQBtK) 50-babynyń 2-bóligine sáıkes, bul jaza júkti áıelderge, 14 jasqa deıingi balalary bar áıelderge, 18 jasqa tolmaǵan adamdarǵa, birinshi jáne ekinshi toptaǵy múgedektigi bar adamdarǵa, sondaı-aq 58 jastan asqan áıelderge, 63 jastan asqan erlerge jáne 14 jasqa tolmaǵan balalardy jalǵyz tárbıelep otyrǵan erlerge qoldanylmaıdy.
Bul norma ata-ana quqyqtary shektelgen adamdarǵa da qatysty.
Máselen, oblys aýdandarynyń birinde turatyn O. esimdi áıelge qatysty eki qaýly shyǵarylǵan. Birinshisi qorǵaý nusqamasyn buzǵany úshin QR ÁQBtK-niń 461-babynyń 1-bóligi boıynsha 10 táýlikke qamaýǵa alýdy kózdese, ekinshisi erekshe talaptardy oryndamaǵany úshin QR ÁQBtK-niń 669-babynyń 2-bóligi boıynsha taǵy 10 táýlikke ákimshilik qamaýǵa alýdy qarastyrǵan.
Quqyq buzýshyǵa qorǵaý nusqamasy arqyly anasyna qatysty janjal shyǵarýǵa, bopsalap balaǵattaýǵa tyıym salynǵan. Sonymen qatar onyń minez-qulqyna erekshe talaptar qoıylyp, alkogoldik ishimdikter ishýine shekteý engizilgen.
Alaıda áıel bul talaptardy saqtamaǵan.
— Prokýratýra organdary sot aktilerin zerdeleý barysynda O. esimdi azamatshanyń 14 jasqa tolmaǵan eki balanyń anasy ekenin anyqtaǵan. Bul oǵan qatysty taǵaıyndalǵan qamaýǵa alý jazalarynyń kúshin joıýǵa negiz bolǵan, — dep habarlady Soltústik Qazaqstan oblysy prokýratýrasynyń baspasóz qyzmeti.
Prokýrordyń qaraýyna berilgen apellıatsııalyq ótinishhattardyń nátıjesinde sot aktileri ózgertilip, ákimshilik qamaýǵa alý jazalary ákimshilik aıyppulǵa aýystyryldy.
Eske salaıyq, munyń aldynda Jambyl oblysynda merziminen buryn shartty túrde bosatylǵan turǵyn qamaýǵa alynǵanyn jazǵanbyz.
