Eki balany shymkenttik jaýyz emshiniń qamqorlyǵyna bergen Óskemen sábıler úıi dırektory qyzmette ósti

ÓSKEMEN. KAZINFORM — Shymkenttik emshi qamqorlyq emes, qorlyq kórsetken alty balanyń ekeýin Óskemennen asyrap alǵan. Bul týraly Kazinform tilshisine sol balalardyń biriniń ájesi aıtyp bergen edi. Olardyń Shymkentke qalaı ketkenin bilý úshin sábıler úıiniń dırektorynan aqparat alǵymyz kelgen. Alaıda bul múmkin bolmady…

Óskemen qalasynda turatyn 65 jastaǵy Natalıa Ýstınova jıen nemeresiniń sábıler úıine qalaı túskenin aıtyp bergen bolatyn. 

Sóz arasynda ol shymkenttik emshiniń Aleksandr esimdi taǵy bir balany asyrap alǵanyn jetkizgen edi, ıaǵnı eki bala bir jerden attanǵan. 

Kazinform tilshisi qaladaǵy Qazybek bı dańǵylynda ornalasqan sol sábıler úıine baryp kórdi. Alaıda kúzetshi dırektordyń ornynda joqtyǵyn aıtyp, ishke kirgizbedi.

Araǵa birneshe kún salyp taǵy barǵanda kúzetshiniń jaýaby esh ózgermedi. Úshinshi rette de qaqpadan ótkizbeı qoıdy.

«Dırektordyń ornyna jaýap beretin orynbasary nemese bólim basshylary bar ma?» degen saýalǵa «Joq» dep qysqa qaıyrdy. 

Sábıler úıiniń jumys telefony nómirine de talaı márte qońyraý shaldyq. Tutqany eshkim kótermedi. Bir aptadan astam ýaqyt ótken soń, áıteýir degende telefondy bireý aldy.

Ózimizdi tanystyryp, mán-jaıdy aıtqan soń mynadaı jaýap estidik: 

«Qazir bizde dırektor joq. Saltanat Erbolatqyzy jumystan shyǵyp ketti. Onyń ornyna áli eshkim taǵaıyndalmady. Al biz eshqandaı suraqqa jaýap bere almaımyz». 

Kóp uzamaı ınsaıderlik aqparat arqyly sábıler úıine jańa basshynyń bekitilgenin estidik.

Birden sábıler úıine habarlasyp edik, qýanyshymyzǵa oraı telefondy ótkendegi qyzmetker lezde kóterdi. 

«Iá, dırektor bolyp Gúlmıra Mırhat taǵaıyndaldy. Biraq ol kisi qazir ornynda joq. Telefon nómirińizdi maǵan qaldyryńyz. Kelgen soń sizge habarlasady», — dedi.

Rasymen de habarlasty. Alaıda ol qoıylǵan suraqtarǵa birden jaýap bere almaıtynyn, ujymmen, jumys barysymen endi tanysyp jatqanyn, 3 kúnde daıyndalyp kezdesýge shaqyratynyn jetkizdi. 

Mejelengen ýaqyt ótti. Gúlmıra Mırhattan habar joq. Ózimiz qonyraý shaldyq. Bul jolǵy jaýaby bizdi tańqaldyrdy: 

«Sizdermen kezdesip, suraqtaryńyzǵa jaýap bere almaımyz. Tek quqyq qorǵaý organdarymen sóılesemiz». 

Bul mekeme ShQO densaýlyq saqtaý basqarmasyna qarasty. Basqarmaǵa habarlasyp, burynǵy basshynyń jumystan qalaı shyqqanyn surap kórdik. 

«Saltanat Erbolatqyzy ol qyzmetten ShQO Juqtyrylǵan ımmýn tapshylyǵy sındromy ortalyǵyna bas dáriger bolyp taǵaıyndalýyna baılanysty bosatyldy», — dep jaýap berdi. 

Eki bala Shymkent turǵynyna qamqorlyqqa berilgen kezde sábıler úıiniń dırektory bolǵan maman jaýaptyraq qyzmetke taǵaıyndalypty.

Al jańa basshynyń ne sebepti bizdiń suraqtarymyzǵa jaýap bergisi kelmeıtinin túsinbedik. Bul másele ary qaraı da tilshi nazarynda bolady. 

Eske salsaq, shymkenttik emshi asyrap alǵan 6 balasyn qorlap, azaptady degen kúdikpen qamaýda otyrǵanyn habarlaǵan edik.

Ol asyrap alǵan balalaryna ıt pen mysyqtyń etin jegizdi degen derek shyqty. 

Sondaı-aq balalardyń eldiń birneshe qalasynan asyrap alynǵany belgili boldy. 

Keıin emshige qatysty iske sotta núkte qoıylyp, U. Smanovqa mamandandyrylǵan úlgidegi psıhıatrııalyq statsıonarda májbúrlep emdeý taǵaıyndaldy.