Eki baladan bastalǵan joba júzden astam erekshe balany biriktirdi
ASTANA. KAZINFORM — Astanada erekshe balalarǵa arnalǵan velosport jobasy sońǵy jyldary aıtarlyqtaı keńeıip, búginde júzden astam bala turaqty túrde jattyǵyp júr. Erekshe bilim berý qajettiligi bar balalardy sport arqyly qoǵamǵa beıimdeý joly jaıly jattyqtyrýshy Qaırat Hadylbek baıandap berdi.
Astanadaǵy velosport klýby osy maqsatta birneshe jyl buryn nebári eki balamen jumys bastaǵan edi. Qazir joba aıasynda 100-den astam bala turaqty túrde jattyǵyp, taǵy júzge jýyq qatysýshy velosıped tebýdi meńgerip shyqqan.
Qaırat Hadylbektiń aıtýynsha, alǵashqy kezeńde mamandardyń ózderi de erekshe balalarmen jumys isteý tájirıbesine bolmaǵanyn aıtady.
— Basynda erekshe balalar aınalysyp júrdi, biraq arnaıy bólimshe bolǵan joq. Keıin klýb ashylyp, biz eki balamen jumysty bastap kettik. Alǵashqy kezde aýtızm týraly da kóp bile qoımaǵan edik. Birtindep tájirıbe jınaqtadyq. Qazir turaqty túrde 100-den astam bala kásibı túrde jattyǵady. Jalpy sany 200-den asady. Bul jerde tek men emes, bes jattyqtyrýshydan quralǵan úlken komanda eńbek etip jatyr, — dedi ol Jibek Joly telearnasynyń «Búgin.LIVE» baǵdarlamasynda.
Jattyqtyrýshynyń sózinshe, velosıped tebýdi úırený kóptegen bala úshin ómirdiń jańa múmkindikterin ashty.
— Ata-analardyń armany ǵoı balasynyń velosıpedke otyrǵanyn kórý. Keıde qýanyshtan kóz jasyna erik beretin sátter bolady. Bizge kelgende «meniń balam úırene ala ma» dep kúmándanatyndar az emes. Biraq barynsha eńbektenip, nátıjege jetkizýge tyrysamyz. Osyndaı sátter bizdiń jumysymyzdyń mańyzyn kórsetedi, — dedi Qaırat Hadylbek.
Mamannyń aıtýynsha, velosport balalardyń fızıkalyq belsendiligin arttyryp qana qoımaı, olardyń áleýmettik daǵdylarynyń qalyptasýyna da oń áser etedi.
— Balalardyń minez-qulqy jaqsy jaqqa ózgeredi. Keıbir balalar sabyrlana bastaıdy. Al sóıleýi qıyn balalardyń sózdik qory kóbeıgenin baıqap júrmiz. Biz medıtsına mamandary emespiz, biraq kúndelikti jumysta balalardyń ózgergenin anyq kóremiz. Olar dostar tabady, komanda ishinde aralasady. Ata-analardyń ózi bir-birimen aralasyp, úlken orta qalyptasty, — deıdi jattyqtyrýshy.
Búginde jobaǵa elimizdiń ózge óńirlerinen de qyzyǵýshylyq artyp keledi. Qaırat Hadylbek bolashaqta erekshe balalarǵa arnalǵan velosport sektsııalaryn Qazaqstannyń basqa qalalarynda ashý josparda bar ekenin aıtty.
Aıta keteıik, Astanada aýtızmmen aýyratyn 2000-daı bala bar.
Buǵan deıin, Premer-mınıstr Oljas Bektenov aýtızmi bar balalardy tárbıelep otyrǵan otbasylardy qoldaý kerektigin aıtqan edi.
