Eki azamattyǵy bar SQO turǵyny elden shyǵaryldy

PETROPAVL. KAZINFORM – Petropavl qalasynyń ákimshilik quqyq buzýshylyq isteri jónindegi mamandandyrylǵan soty shetel azamattyǵyn alý faktisi týraly zańmen belgilengen merzimde habarlamaǵan adamnyń isin qarady.

Soltústik Qazaqstan oblystyq sotynyń málimetinshe, buryn Qazaqstan Respýblıkasynyń azamaty bolǵan adam 2020 jylǵy 13 qańtarda Reseı Federatsııasy azamatynyń tólqujatyn alǵan, biraq bul týraly Qazaqstan Respýblıkasynyń ýákiletti organdaryna belgilengen 30 kún ishinde habarlamaǵan. Sondaı-aq Qazaqstan Respýblıkasy azamatynyń tólqujatyn tapsyrmaǵan.

Bul elimizdiń zańnamasynyń talaptaryn buzady, óıtkeni basqa memlekettiń azamattyǵyn alǵan adam bul týraly quzyretti organdarǵa habarlaýǵa jáne Qazaqstan Respýblıkasynyń azamattyǵynan shyǵýǵa mindetti. Bul quqyq buzýshylyq úshin ákimshilik jaýapkershilik qarastyrylǵan.

Іsti qaraǵan sot shetel azamatyn Qazaqstan Respýblıkasynyń aýmaǵynan shyǵaryp jiberý túrindegi ákimshilik jazany qoldandy.

Buǵan deıin Petropavlda «Uly dala kerýeni» atty halyqaralyq kóshpeli kórme jumys istep jatqanyn jazǵan edik.