Eki aıda 200 ret óshti: ShQO turǵyndary elektr jaryǵy jıi óshetindigine shaǵymdandy
ÓSKEMEN. KAZINFORM — Óskemen qalasynda ǵalym-geolog Qanysh Sátbaev esimine berilgen dańǵyl turǵyndary páterlerde jaryq jıi sónetindigine shaǵymdandy. Olardyń aıtýlarynsha, buǵan jelilerdiń ábden eskirgeni sebep.
Alty aıda 2 iri apat boldy
Qala turǵyny Aıajan Ǵazızova jaryqtyń óshýi keıde kún saıyn qaıtalanatyndyǵy qolaısyzdyqtan bólek psıhologııalyq qysym ekenin jetkizdi. Tipti byltyr jazda Jibek-matalar kombınaty yqshamaýdanyndaǵy Іlııas Esenberlın dańǵylynda jaryq shamamen on saǵat boıy óship qalǵan. Al bıyl Qanysh Sátpaev dańǵyly, 24 mekenjaıyndaǵy úıde mundaı jaǵdaı jıilep ketken.
— Qarańǵyda qorqamyz. Jaryqtyń aıaqasty óshýi men úshin kádimgideı kúızelis. Ásirese keshki ýaqytta. Kishkentaı balasy bar otbasylar ne isteıdi? Qart adamda qaıtpek?! — dedi ol.
Jaryq óshken saıyn turǵyndar chatta qyzyl keńirdek talqylaý ótkizetin kórinedi.
— «Barlyq úıde óshti me?», «Qashan qosylady?», «Taǵy apat pa?» degen suraqtardy jańbyrsha jaýdyramyz. Osyǵan qarap, tehnıkalyq másele áleýmettik-psıhologııalyq deńgeıge kóterilip bara jatqan sııaqty, — dedi turǵyndardyń biri.
Oblys, qala aýmaǵynda elektr energııasynyń jıi óshýi kezdeısoq jaǵdaı emes. Shyǵys Qazaqstan jáne Abaı oblystary boıynsha «BESK» AQ aqparatynsha, apattyq ajyratýlardyń negizgi sebebi — 10 kV kabeldik jeliler zaqymdanǵandyqtan. Sońǵy alty aıda óńirde eki iri apat tirkeldi.
— Aldymen byltyr 16 qarashada Jibek matalar kombınaty shaǵynaýdanynda bolǵan. Ol kezde qosalqy stantsııadan taraıtyn J-39 jelisi isten shyqty. Ekinshi iri apat osy jyly 2 naýryzda J-23 jelisinde tirkelip, transformatorlyq qosalqy stantsııalar arasyndaǵy ýchaske zaqymdanǵan, — dep habarlady kompanııadan.
Apattardyń negizgi sebepteri qandaı?
Mamandardyń aıtýynsha, tutynýshylar qaýipsizdigin qamtamasyz etý maqsatynda sońǵy jyldary birqatar rezervtik jeli tartyldy. Máselen, 2024 jylǵy ınvestıtsııalyq baǵdarlama aıasynda qosalqy stantsııadan taratý pýnktine deıin 2,9 shaqyrym rezervtik kabel ornatylǵan. Alaıda bul sharalar da máseleni túpkilikti sheshpeı otyr. 2026 jyldyń qańtar-aqpan aılarynda oblysta 126 apattyq jáne 101 josparly ajyratý tirkelgen. Bul eki aı ishinde elektr qýatynyń 200-den astam ret óshkenin kórsetedi.
— Apattardyń negizgi sebepterine elektr jelileriniń zaqymdanýy, qolaısyz aýa raıy jáne syrtqy faktorlar jatady, — dedi «BESK» AQ tóraǵasynyń orynbasary Talǵat Qusaıynov.
Sarapshylar pikirinshe, negizgi problema — ınfraqurylymnyń tozýy. Óńirdegi elektr jelileriniń shamamen 80 paıyzy eskirgen. Al keıbir transformatorlar 40-50 jyl buryn ornatylǵan. Mundaı júıe qazirgi júktemeni tolyq kótere almaıdy. Sondaı-aq elektr energııasyn tutyný kólemi jyl saıyn artyp keledi. Máselen 2024 jyly Óskemen qalasynda 862 mln kVt/saǵat energııa tutynylsa, 2025 jyly bul kórsetkish 883 mln kVt/saǵatqa jetken.
Óskemen qalasynyń ákimdigi de mundaı máseleniń bar ekenin jasyrmady. Qala basshysy Almat Aqyshovtyń aıtýynsha, elektr qýatynyń tapshylyǵy bar. Ásirese, 20-shaǵyn aýdandaǵy jaǵdaı sonyń aıqyn dáleli. Bul aýmaqta qurylys kezinde ınjenerlik ınfraqurylym eskerilmegen.
Sonyń saldarynan jańa úıler álsiz jelilerge qosylǵan.
— Infraqurylym men qurylys qatar damymaǵan. Qazir biz sol sheshimderdiń saldarymen betpe-bet kelip otyrmyz, — dedi qala ákimi.
Eske salsaq, osyǵan deıin Atyraýda topyraq aralas jańbyr saldarynan 27 myńǵa jýyq tutynýshy jaryqsyz qalǵany habarlanǵan.
