Eki aýdanǵa mal qorymyn salýy tıis bolǵan kásipker 12 jyldan soń ustaldy
AQTÓBE. KAZINFORM – Aqtóbelik kásipker mal qorymyn salý úshin konkýrsqa túsip, 17 mln teńge alǵan. Keıin qashyp ketip, 12 jyldan soń Almaty oblysynyń aýylynan ustaldy.
Aqtóbe oblystyq Polıtsııa departamentiniń habarlaýynsha, kásipker 2012 jyly mal qorymyn salýǵa kelisken. Ol qarjyny bank arqyly bólip-bólip alyp, keıin habar-osharsyz ketken.
- Jaýapkershiligi shekteýli seriktestik dırektory 17 mıllıon teńge aqshany ıelengen. Mal qorymyn salamyn degen kelisimdi oryndamaı, qashyp ketken. Qylmystyq kodekstiń «Alaıaqtyq» baby boıynsha qylmystyq is qozǵalyp, kúdikti memleketaralyq izdeýge jarııalandy. Polıtsııa qyzmetkerleri ony Almaty oblysyndaǵy aýyldardyń birinde jasyrynyp júrgen jerinen ustady, - dedi oblystyq PD baspasóz qyzmeti.
Aıta keteıik, kásipker Aqtóbe qalasyna jetkiziledi. Tergeý jáne sot Aqtóbede ótedi.
