Eki aptalyq kýrsty bitirgen psıholog mamandardyń dáýreni bitti — Aımaǵambetov
ASTANA. KAZINFORM — Májilis depýtaty Ashat Aımaǵambetov Parlament qabyldaǵan psıhologııalyq qyzmet týraly qujatqa qatysty pikir aıtty.
— Jalǵan psıholog mamandardyń dáýreni bitti. Búgin bizdiń «Psıhologııalyq qyzmet týraly» avtorlyq zańymyz Senattan sátti ótip, Prezıdenttiń qol qoıýyna jiberildi. Buǵan deıin qalaı edi? Kúızeliske túsken adam Instagramnan ádemi paraqshasy men kúmándi sertıfıkaty bar «mamandy» taýyp, sońǵy aqshasyn sanap berse de, jaǵdaıy tek nasharlaı túsetin. Myńdaǵan adamnyń, otbasynyń taǵdyryn kúl-talqan etti. Sala zańmen rettelmegendikten, olar eshqandaı jaýapqa tartylmaıtyn. Endi bul ózgeredi. Zańnyń basty baǵyttaryna toqtalsaq, dıplomsyz jáne reestrsiz psıholog bolmaıdy. Endi arnaıy joǵary bilimi (dıplomy) joq jáne biryńǵaı memlekettik reestrge tirkelmegen adamdarǵa ózin «psıholog» dep ataýǵa zańmen tyıym salynady. Kez kelgen azamat mamannyń reestrde bar-joǵyn ońaı teksere alady. Reestrde joqtardyń qyzmet kórsetýge quqyǵy bolmaıdy, — dep jazdy Ashat Aımaǵambetov áleýmettik jelidegi paraqshasynda.
Onyń aıtýynsha, dıplomy joq mamandar men trenerlerge óz jarnamasynda «psıholog» sózin, sondaı-aq odan týyndaıtyn kez kelgen ataýlardy (mysaly, «psıho-koých», «psıho-keńesshi») qoldanýǵa resmı túrde tyıym salynady.
— Eki aptalyq kýrsty bitirgenderdiń dáýreni bitti. Onlaın-jarnama baqylanady. Psıholog mamandar áleýmettik jelide ózderiniń reestrdegi nómiri men bilimin ashyq kórsetýge mindetteledi. «Problemany 1 kúnde sheshemin» nemese «nátıjege 100 paıyz kepildik beremin» dep jalǵan ýáde berip, halyqty aldaǵandar jaýapqa tartylady. Kúrdeli taqyryptarǵa tek kásibı mamandar jiberiledi. Depressııa, mazasyzdyq sııaqty tereń máselelermen jáne jalpy psıhologııalyq kómek kórsetýmen endi tek kásibı, dıplomy bar mamandar ǵana aınalysady. Kásibı daıyndyǵy joq «mamandar» bul salaǵa jolaı almaıdy, — dedi depýtat.
Sonymen qatar ol psıholog pen psıhıatrdyń arajigi ajyratylatynyn aıtty. Psıholog — dáriger emes. Oǵan medıtsınalyq dıagnoz qoıýǵa, dári-dármek jazýǵa nemese adam sanasyna áser etetin psıhoaktıvti ádisterdi qoldanýǵa qatań tyıym salynady. Eger patsıentte aýyr psıhıkalyq aýytqý belgileri bolsa, psıholog ony birden dáriger-psıhıatrǵa baǵyttaýǵa mindetti.
— Kásibı qupııa zańmen qorǵalady. Sizdiń psıhologqa aıtqan qupııańyz, jeke ómirińiz sizdiń jazbasha kelisimińizsiz esh jerde jarııalanbaıdy. Sizdi ruqsatsyz vıdeoǵa nemese aýdıoǵa túsirýge de qatań tyıym salynady. Memleket adamnyń psıhıkalyq saýlyǵy — turmystyq qyzmet emes, óte jaýapty is ekenin zańmen bekitti. Memleket basshysy tarapynan osy mańyzdy salany retteý boıynsha tapsyrmalar berildi, bul baǵyttaǵy jumys jalǵasady, — dedi Ashat Aımaǵambetov.
Aıta keteıik, búgin Senat «Psıhologııalyq qyzmet týraly» Zańdy maquldady.
