Eki aptada Ózbekstan Taıaý Shyǵys elderinen 33 myńǵa jýyq otandasyn evakýatsııalady
TAShKENT. KAZINFORM – 13 naýryzǵa deıin eldiń Syrtqy ister mınıstrligi Taıaý Shyǵys memleketterinen 32 934 ózbekstandyqty evakýatsııalady, dep habarlaıdy Kazinform agenttiginiń Tashkenttegi menshikti tilshisi.
Vedomstvonyń málimetinshe, 12 naýryzda Ózbekstan elshiliginiń qyzmetkerleri Qatardaǵy 49 otandasyn BAÁ men Saýd Arabııasyna jiberýge járdemdesti. Olar atalǵan elder arqyly Otanyna oraldy.
Sondaı-aq Ózbekstannyń BAÁ-degi dıplomatııalyq ókildikteriniń kómegimen Tashkentke 147 azamat qaıtaryldy. Munymen birge, keshe Irannan – 5, Izraılden 4 ózbekstandyq ózge memleketterdiń aýmaǵyna shyǵaryldy.
– Ózbekstan azamattarynyń Otanyna qaýipsiz oralýyn qamtamasyz etý boıynsha dıplomatııalyq ókildikterdiń jumysy jalǵasyp jatyr, - dep málim etti Syrtqy ister mınıstrliginen.
Eske salaıyq, 9 naýryzǵa deıin eldiń Syrtqy ister mınıstrligi Taıaý Shyǵys memleketterinen 21 712 ózbekstandyqty evakýatsııalady.
Buǵan deıin habarlaǵanymyzdaı, Ózbekstan Taıaý Shyǵystaǵy shıelenistiń iri qaqtyǵysqa ulasýyna alańdaýshylyq bildirdi.
Tıisinshe, Ózbekstan prezıdenti Shavkat Mırzıeev Taıaý Shyǵystaǵy qaqtyǵysqa baılanysty jaýapty mınıstrlikke eldiń qorǵanys áleýetin nyǵaıtýdy tapsyrdy.