Eki apta buryn taǵaıyndalǵan Ulybrıtanııa premeri demalysqa shyqty
ASTANA. KAZINFORM — Ulybrıtanııanyń premer-mınıstri Endı Bernem qyzmetine kiriskenine eki aptadan sál ǵana asqan soń shetelge demalysqa ketip, eldegi kóshi-qon máselesine baılanysty oppozıtsııanyń synyna ushyrady.
Report agenttiginiń habarlaýynsha, Kır Starmerdiń otstavkasynan keıin bıylǵy 20 shildede úkimet basshysy qyzmetine kirisken Bernem tamyz aıynyń basynda shetelge attanǵan.
Premerdiń ókilderi úkimettiń qalypty rejımde jumysyn jalǵastyryp jatqanyn málimdedi. Olardyń aıtýynsha, Endı Bernem sheneýniktermen turaqty baılanysta bolyp, jumys kezdesýlerin qashyqtan ótkizip jatyr.
Soǵan qaramastan, premerdiń demalysy oppozıtsııa tarapynan synǵa ushyrady. Atap aıtqanda, Reform UK partııasynyń tóraǵasy Lı Anderson Bernemniń elde zańsyz kóshi-qon men La-Mansh buǵazy arqyly shaǵyn qaıyqtarmen ótetin mıgranttar máselesi ýshyǵyp turǵan kezde demalysqa ketkenin synǵa aldy.
Al Endı Bernemdi qoldaýshylar tamyz aıyndaǵy qysqa merzimdi demalys Ulybrıtanııa premer-mınıstrleri úshin qalypty tájirıbe ekenin atap ótti. Sebebi bul kezeńde parlament jazǵy demalysqa shyǵady.
Aıta keteıik, Ulybrıtanııanyń jańa premer-mınıstri Endı Bernem 20 shilde kúni qyzmetine resmı kirisip, jańa úkimet quramyn jasaqtaı bastaǵan bolatyn.
