Eki altyn medal Qazaqstan velosportynyń eń joǵary deńgeıde ekenin kórsetti — Raımbek Batalov
ASTANA. QazAqparat – Qazaqstandyq veloshabandozdar Japonııadaǵy jazǵy Azııa oıyndarynda bir kúnde eki altyn medal jeńip alyp, el velosportynyń joǵary deńgeıin taǵy bir márte dáleldedi. Bul týraly Qazaqstan Ulttyq velosport federatsııasynyń prezıdenti Raımbek Batalov málimdedi, dep habarlaıdy Kazinform tilshisi.
Federatsııa basshysynyń aıtýynsha, sportshylardyń búgingi jetistigi – birneshe jyl boıy qalyptasqan otandyq velosport mektebiniń júıeli jumysynyń nátıjesi.
- Búgin biz úshin óte mańyzdy kún. Meniń oıymsha, velosport óziniń áleýetin taǵy bir márte kórsetti. Bul – ondaǵan jyl boıy qalyptasqan úlken mektep. Búgin bizde eki altyn medal bar. Qazirgi tańda Qazaqstan altyn medal sany boıynsha kóptegen elden alda keledi. Alda taǵy eki toptyq jarys bar. Tasjoldaǵy velosportta jańa jetistikterge jetemiz dep úmittenemiz, – dedi Raımbek Batalov.
Federatsııa prezıdenti joǵary nátıjege sportshylar men jattyqtyrýshylar shtabynyń birlesken eńbegi arqyly qol jetkizilgenin atap ótti.
- Sportshylarymyz jarady, jarysqa óte jaýapkershilikpen daıyndaldy. Týrızm jáne sport mınıstrliginiń, ákimdikterdiń, Velosport federatsııasynyń jáne demeýshilerimizdiń qoldaýynsyz mundaı nátıjege jetý múmkin emes edi, – dedi ol.
Raımbek Batalov Qazaqstanda velosportty damytý jumystary buqaralyq jáne balalar sportynan bastap kásibı deńgeıge deıin júıeli túrde júrgizilip jatqanyn atap ótti.
- Biz balansty buqaralyq sporttan bastap kásibı sportqa deıin júıeli jumys júrgizip kelemiz. Bul Qazaqstan velosportynyń eń joǵary deńgeıde ekenin taǵy bir kórsetti. Biz osy bıiktikti saqtap, jeńisimizdi jalǵastyra beremiz, – dedi federatsııa basshysy.
Onyń aıtýynsha, qazaqstandyq sportshylardyń halyqaralyq arenadaǵy jetistikteri el turǵyndaryn buqaralyq sportqa tartýǵa da yqpal etedi.
- Maǵan qazir velosportty jaqsy kóretin kóptegen jankúıer qońyraý shaldy. Mundaı jeńister adamdardy salaýatty ómir saltyn ustanýǵa, sportpen aınalysýǵa yntalandyrady. Bul jeńis búkil Qazaqstan halqynyń jeńisi dep oılaımyn, – dep qorytyndylady Raımbek Batalov.
Osyǵan deıin habarlaǵanymyzdaı, Qazaqstan quramasy tasjoldaǵy velosporttan jekeleı synda eki altyn medal jeńip aldy. Rınata Sultanova el qorjynyna alǵashqy altyn, al Alekseı Lýtsenko ekinshi altyn júlde syılady.
Qazaqstan delegatsııasy 4 altyn jáne 2 qola medal enshilep, jalpy esepte tórtinshi orynnan kórindi.
